Koronavırýs qaıta kúsheıdi, Pfizer vaktsınasy halyqtyń barlyq sanatyna qoljetimdi bolady – Ajar Ǵınııat

ASTANA. QazAqparat – QR Densaýlyq saqtaý mınıstri Ajar Ǵınııat eldegi epıdemologııalyq jaǵdaıdy baıandady jáne koronavırýsqa qarsy qansha vaktsına qoljetimdi ekenin aıtty, dep habarlaıdy QazAqparat tilshisi.

«Búgingi tańda koronavırýsqa qarsy vaktsınanyń 500 myń dozasy bar. Bul Qazvac jáne Sinofarm. Qazir qujattarǵa qol qoıylyp jatyr, bizge gýmanıtarlyq kómek – Pfizer vaktsınalary kelip jatyr. Meniń oıymsha, kelesi aptada Pfizer vaktsınasynyń qansha dozasyn alatynymyzdy habarlaımyz. Jáne ol vaktsına alǵysy keletin halyqtyń barlyq sanatyna beriledi», - dep jaýap berdi A. Ǵınııat tilshi suraǵyna.

Qazir jappaı vaktsınalaý bolmaǵandyqtan, revaktsınatsııa negizinen býsterlik dozalarmen (bir doza) júredi, sondyqtan egý naýqany negizinen emhanalarda ótip jatyr.

«Revaktsınatsııa júrgizý kerek. Sebebi, qazir álemde koronavırýs juqtyrǵyndar sany ósip jatyr. Ásirese, Qytaı, Ázerbaıjan, Izraılde jáne taǵy basqa elderde vırýs juqtyrǵandar sany kúrt ósti. Sondyqtan biz halyqqa revaktsınatsııa kerek dep aqparat taratyp jatyrmyz. Ol úshin koronavırýsqa qarsy vaktsınalar bar. Adamdar vaktsına almaı turyp, profılaktıkalyq tekseris júrgiziledi», - dedi Densaýlyq saqtaý mınıstri.