Koronavırýs qaýpine baılanysty saýda oryndary jabylýy múmkin be - mınıstrdiń jaýaby

NUR-SULTAN. QazAqparat – Koronavırýs ınfektsııasynyń taralý qaýpine baılanysty elimizdegi saýda oryndary jabyla ma? Bul suraqqa Saýda jáne ıntegratsııa mınıstri Baqyt Sultanov jaýap berdi, dep habarlaıdy QazAqparat tilshisi.

«Saýda núktelerin jabýǵa qatysty áńgimege keler bolsaq, qazir bári de - bazarlar da, óndiris te jumys istep tur. Taýyq burynǵysha jumyrtqalap, sıyr baıaǵydaı saýyla beredi. Naýbaıhanalar jabylmaıdy. Saýda núkteleri de, saýda alańdary da burynǵydaı jumysyn jalǵastyra beredi. Mine bul – eshqandaı dúrbeleń týǵyzýdyń qajeti joq», - dedi Baqyt Sultanov Ortalyq kommýnıkatsııalar qyzmetinde ótken baspasóz máslıhatynda.

Eske sala ketsek, buǵan deıin atalmysh baspasóz máslıhatynda Baqyt Sultanov koronavırýs ınfektsııasyna baılanysty sýpermarketter men bazarlarda týyndaǵan dúrbeleńge baılanysty qazaqstandyqtardy sabyrǵa shaqyrǵan bolatyn.