Koronavırýs: Izraıl turǵyndarynyń kópshiligi vaktsına alyp, elde shekteý sharalary alyndy
21 aqpan, jeksenbiden bastap Izraıl koronavırýs ınfektsııasynyń taralýyna baılanysty engizilgen shekteý sharalaryn alyp tastady. Turǵyndardyń jartysyna jýyǵy kem degende vaktsınanyń alǵashqy bóligin alyp úlgerdi.
Elde sport zaldary, qonaqúıler men dinı mekemelerdiń jumysy jandandy. Kelýshilerde vaktsına jasaǵany nemese antıdeneniń bar ekenin dáleldeıtin qujat ákelýi qajet. Ekpe nemese antıdeneniń bar ekeni týraly málimet Densaýlyq saqtaý mınıstrliginiń tapsyrys boıynsha jasalǵan arnaıy mobıldik baǵdarlamada kórsetiledi.
Sondaı-aq, Izraılde barlyq dúkenniń jumysy jandanady, olarǵa barý úshin koronavırýsqa ınfektsııasyna qarsy ımmýnıtettiń bar ekenin dáleldeýdiń qajeti joq.
Izraıl turǵyndary burynǵysha áleýmettik qashyqtyq saqtaýǵa mindetti. Banket zaldary men meıramhanalarda bıleýge tyıym salynǵan, al meshitke, sınagogke, shirkeýge bir ýaqytta keletin adam sany jartysynan aspaýy kerek.
Izraıldegi vaktsınatsııa kampanııasy – álemdegi eń belsendi jáne jyldam kampanııalardyń biri. Pfizer vaktsınasynyń alǵashqy bóligin 9 mıllıon halyqtyń 45%-dan astamy alyp úlgerdi.
El bıliginiń málimeti boıynsha, vaktsınanyń eki dozasynyń tıimdiligi - 95,8%. Izraılde pandemııa bastalǵaly 740 myń adam koronavırýs juqtyryp, 5500-ge jýyǵy qaıtys boldy. El bıligi byltyr úsh ret qatań karantın tártibin engizdi. Izraıl úkimeti tórtinshi karantın bolmaıdy dep ýáde berdi.