Koronavırýs: Izraıl halqy budan bylaı maska kııýge mindetti emes, Nepalda dári-dármek tapshy

NUR-SULTAN. QazAqparat - Koronavırýstyń taralýyna qarsy vedomstvoaralyq komıssııa álemdegi epıdemıologııalyq ahýalǵa sholý jasady, dep habarlaıdy QazAqparat.

Vaktsınatsııa tólqujatymen Pragaǵa. Chehııa «Spýtnık V» nemese Sinopharm vaktsınasyn alǵan Slovakııa, Vengrııa jáne Serbııa turǵyndaryna PTR zertteýdiń teris nátıjesi bar anyqtamasyz, sondaı-aq, mindetti karantınsiz elge kirýge ruqsat berdi.

Bul týraly Chehııanyń densaýlyq saqtaý mınıstri Adam Voıteh málimdedi.

Betperde kııý talaby alyndy. Búginnen bastap Izraıldiń turǵyndary qoǵamdyq orynda qorǵanys maskasyn kııýge mindetti emes.

Bul – koronavırýs pandemııasyna baılanysty engizilgen sońǵy shekteýlerdiń biri.

Tek sheteldikterdiń elge kirýine tyıym salatyn talaptar alynǵan joq.

Izraılge tek erekshe otbasylyq nemese jumys jaǵdaılary boıynsha kirýge ruqsat etilgen.

Nepalda koronavırýs ınfektsııasymen kúresti júrgizýge qajetti dári-dármek tapshy.

Pandemııa saldarynan aýrýhanalarda bos oryn joq. Munda eń qajet degen dári-dármekter men qurylǵylardyń tapshylyǵy baıqalýda.

Halyqaralyq uıymdar qaýymdastyqty Nepalǵa gýmanıtarlyq kómek retinde ottegi ballondaryn, ókpeni jasandy jolmen jeldetý apparattaryn jáne COVID-19-ǵa qarsy ekpelerdi jetkizýge shaqyrady.

28,6 mln halqy bar Nepalda sońǵy táýlikte koronavırýstyq ınfektsııaǵa shaldyǵý jaǵdaılarynyń sany 2 049-ǵa artyp, 610 521-ge jetti.