Koronavırýs: Grýzııa oqý jylynyń bastalýyn keıinge qaldyrdy

TBILISI. QazAqparat – Grýzııanyń Tbılısı, Kýtaısı, Rýstavı, Gorı, Zýgdıdı jáne Potı sııaqty 6 iri qalasynda oqý jylynyń bastalýy eki aptaǵa, ıaǵnı 1 qazanǵa deıin qaldyryldy. Bul týraly búgin vedomstvoaralyq úılestirý keńesiniń otyrysynan keıin eldiń premer-mınıstri Georgıı Gaharııa málimdedi. QazAqparat bul týraly «Grýzııa jańalyqtary» agenttigine silteme jasap habarlaıdy.

«Osy qalalardaǵy joǵary oqý oryndary, sondaı-aq mektepter oqý protsesin 1 qazannan bastaıdy. Bul qazirgi táýekelderdi durys baǵalaý úshin qajet. Ol úshin epıdemıologtar men bizderge eki apta qajet. Osydan keıin biz balalarǵa qatysty qosymsha sheshimder qabyldaımyz», – dedi Gaharııa.

G.Gaharııa naqtylap ótkendeı, bul shekteýler iri qalalardaǵy barlyq jekemenshik jáne memlekettik oqý oryndaryna qatysty.

15 qyrkúıek – 1 qazan aralyǵynda stýdentter men oqýshylar qashyqtan oqıtyn bolady.

Aıta ketsek, buǵan deıin oqý jylynyń bastalýy eldegi indet oshaǵyna aınalǵan - Batýmı men Kobýletı qalalarynda keıinge shegerilgen bolatyn.

Grýzııada koronavırýstyń órshýi 1 qyrkúıekten beri turaqty saqtalyp keledi. Sońǵy táýliktiń ózinde koronavırýstyń jańadan 87 jaǵdaıy tirkeldi. Bul epıdemııa bastalǵaly rekordty kórsetkish bolyp tabylady.