Koronavırýs: Germanııa Rojdestvoǵa deıin vaktsınany sertıfıkattan ótkizbek

BERLIN. QazAqparat – Germanııa Eýroodaq aýmaǵynda Pfizer/BioNTech vaktsınasyn Rojdestvoǵa deıin sertıfıkattan ótkizbek. Germanııanyń densaýlyq saqtaý mınıstri búgin osyndaı málimdeme jasady, dep habarlaıdy QazAqparat tilshisi euronews-ke silteme jasap.

Eýroodaqta tóraǵalyq etip otyrǵan Germanııa osy máseleni retteýshi – Eýropalyq medıtsınalyq qural-jabdyqtar agettigine edáýir qysym jasap otyr. Osylaısha Germanııa Eýropadaǵy indet qaıta órshigen kezeńde vaktsınatsııany tezirek bastaýdy kózdeýde.

Germanııanyń ózinde qatań karantın sharalary engizilgen. Ol karantın sharalary qańtar aıynyń ortasyna deıin kúshinde bolady.

«Jaqsy jańalyq týraly aıtar bolsaq, vaktsına 23 jeltoqsanda sertıfıkattan ótýi múmkin. Álbette, ol úshin qazirgi málimetter óńdelýi tıis. Optımıstik stsenarııge júginer bolsaq, 23 jeltoqsanǵa qaraı bári de daıyn bolýy tıis. Bul – búkil Eýropalyq odaq úshin keremet jańalyq bolar edi», - deıdi Germanııanyń densaýlyq saqtaý mınıstri Iens Shpan.

Eýropalyq odaqtyń basqa da memleketterindeı Germanııada vaktsınatsııa ortalyqtary salynyp, vaktsınany jetkizýdiń logıstıkalyq máseleleri, saqtaý jáne basqa da antıvırýsty preparattardy taratý isteri sheshilip jatyr. Alaıda Eýropanyń ishinde vaktsınany sertıfıkattan ótkizip, jappaı ekpe jumystaryn bastap ketken memleket – Eýroodaqtyń quramynan shyǵyp bara jatqan Ulybrıtanııa bolyp otyr.