Koronavırýs: Frantsııada mektepter, ýnıversıtetter men balabaqshalar jabylyp jatyr
Bul týraly prezıdent Emmanýel Makron málim etken, dep habarlaıdy QazAqparat The Local France-qa silteme jasap.
Beısenbi kúni keshkisin Frantsııa prezıdenti Emmanýel Makron telearna arqyly vırýsqa qarsy kúreske baǵyttalǵan jańa sharalardy jarııalady. Elde 2 870 adam koronavırýs juqtyrǵany jáne 61 adamnyń osy aýrýdan kóz jumǵany anyqtaldy.
Dúısenbiden bastap barlyq balabaqshalar, mektepter men ýnıversıtetter jańa buıryq shyqqanǵa deıin jabylady. Sondaı-aq, prezıdent 70-ten asqandardy, densaýlyǵy nasharlardy úıde qalyp, jurtpen baılanysty barynsha shekteýge shaqyrdy.
Bılik 15 jáne 22 naýryzǵa josparlanǵan mýnıtsıpaldyq saılaýdy keıinge qaldyrmaǵanyn habarlady.
Emmanýel Makron kásiporyn qyzmetkerlerin úıden jumys isteýge kóshirýge jáne qozǵalysty barynsha shekteýge shaqyrdy. Sondaı-aq, ol qoǵamdyq kóliktiń qalypty rejimde jumys isteıtinin aıtty.