Koronavırýs: Eýropalyqtar shekarany jaýyp jatyr
Germanııa úkimeti koronavırýs kóp anyqtalyp jatqan memleketterdiń saıahatshylarynyń elge kelýine tyıym salmaqshy. Bul rette tizimde Portýgalııa, Ulybrıtanııa, OAR, Brazılııa sııaqty memleketter tur. Shekaradan ótýge ruqsat tek júk tasymaldaýshylarǵa ǵana berilýi múmkin.
«Bizge tap qazir áreket etý kerek»,-dep málimdedi Іshki ister mınıstri Horst Zeehofer.
«Qolda bar aqparattarǵa qaraǵanda, biz aldaǵy ýaqytta josparymyzǵa sáıkes keletin sheshimderdi jalpyeýropalyq deńgeıde qabyldaı almaımyz. Sondyqtan da biz qazir ulttyq deńgeıdegi sharalardy qolǵa alyp jatyrmyz», - dedi ol.
Juma kúni bılik ókilderi ózderiniń naqty ustanymdaryn habardar etedi. Norvegııa óziniń shekarasyn jabatyny týraly málimdedi. Elge kirý tek asa qatty qajettilik týyndaǵanda ǵana ruqsat etiledi. Bılik ókilderi taýar tasymaldaýǵa ruqsat berdi. Sonymen qatar Shvetsııa men Fınlıandııadan keletin medıtsına mamandarynyń elge kirýine bolady.
Premer-Mınıstr Erna Sýlberg: «Qańtardyń 29-na qaraǵan túni biz Norvegııaǵa kirýdiń eń qatań erejelerin engizemiz. Іs júzinde shekara bizdiń elimizde turmaıtyn azamattardyń barlyǵy úshin jabylady»,-dedi.
Ol sonymen qatar asa qajetti taýarlar burynǵysynsha Norvegııaǵa jetkizile beretinin jáne erekshe qajet qyzmet túrleri de kórsetiletinin aıtty. Al, eńbek mıgranttary kelesi aptada elge kele almaıdy. Bul tártip eki aptadan soń qaıta qaralady.
London bolsa, Birikken Koroldikke Portýgalııadan, Ońtústik Amerıka elderi men Afrıka memleketterinen kelýshilerge mindetti karantın engizbek. Adamdar 10 kún boıy meımanhanadan shyqpaı jatady. Tártip buzǵandarǵa aıyppul salynady.
Mundaǵy maqsat – Koroldikke jańa jáne óte qaýipti vırýs shtamdaryn juqtyrǵandardyń aýrýdy elge taratýynyń aldyn alý. Egjeı-tegjeıli jospardy bılik ókilderi kelesi aptada usynbaq.
Osyǵan deıin atalǵan talaptardyń Aýstralııa men Jańa Zelandııada da engizilgeni habarlandy.