Koronavırýs boıynsha eń kúrdeli jaǵdaı Nur-Sultan qalasynda – Eraly Toǵjanov

NUR-SULTAN. QazAqparat – QR Premer-Mınıstriniń orynbasary Eraly Toǵjanov Úkimettiń keńeıtilgen otyrysynda Prezıdentke eldegi epıdemıologııalyq ahýal týraly esep berdi, dep habarlaıdy QazAqparat tilshisi.

«Delta shtamynyń elimizde tirkelýine baılanysty Úkimet epıdemıologııalyq jaǵdaıdy turaqtandyrý boıynsha keshendi aldyn alý sharalaryn qabyldady. Birinshi, densaýlyq saqtaý júıesiniń barlyq resýrstary jumyldyryldy. Materıaldyq-tehnıkalyq jabdyqtar, dári-dármektiń eki aılyq qory, kadrlyq rezerv daıyndaldy.

Ekinshi, qalyptasqan epıdahýalǵa baılanysty barlyq óńirlerde karantındik sharalar qatańdatyldy. Úshinshiden, búginde jalpy 32 myń ınfektsııalyq tósek-oryn bar, onyń 37 paıyzy qoldanysta. Degenmen eń kúrdeli jaǵdaı Nur-Sultanda, keshe qalada qosymsha tósek-oryndar ashyldy. Qabyldanǵan sharalarǵa qaramastan munda ınfektsııalyq oryndardyń 62 paıyzy, reanımatsııalyq oryndardyń 85 paıyzy naýqastarmen tolyp otyr. Onyń sebebi – elordada sońy aıda naýqastaný sany tórt esege artyp otyr», - dedi Eraly Toǵjanov.

Onyń aıtýynsha, jalpy barlyq óńirlerde, onyń ishinde Almaty, Shymkent qalalarynda, Qaraǵandy, Mańǵystaý, Aqtóbe, Batys Qazaqstan oblystaryndaǵy jaǵdaı qatań baqylaýda. Epıdemıologııalyq ahýal ýshyǵa túsken jaǵdaıda qosymsha 50 myń tósek-oryn qory daıyn.

Óz kezeginde elorda ákimi Altaı Kólginov shynynda da Delta shtamynyń elge kelýimen epıdahýal qıyndaǵanyn, oń nátıjesi bar PTR taldaýlary kóbeıgenin atap ótti.

«Osyǵan baılanysty Vedomstvoaralyq komıssııa otyrysynda karantındik shekteýler boıynsha qosymsha sharalar qabyldandy. Máselen, demalys kúnderi qoǵamdyq kólik toqtatyldy, qoǵamdyq tamaqtaný ýaqyty qysqartyldy, kınoteatr sekildi oıyn-saýyq mekemeleri ýaqytsha jabyldy. Osy aptada statsıonarǵa júkteme kóp bolǵandyqtan qosymsha 900-den astam oryn ashtyq. Búgingi kórsetkish boıynsha, tósek-orynnyń 62 paıyzynda naýqastar jatyr. Rezervte áli de oryn jetkilikti.

Vaktsınalaý boıynsha jumystardy kúsheıttik. Eki apta buryn táýligine 1300-1500 vaktsına egilse, qazir kún saıyn 6500-7000 vaktsına salynady. Jalpy vaktsınalaý josparynyń 43 paıyzy oryndaldy. Pedagogtardyń 85 paıyzy, kommýnaldyq qyzmetkerlerdiń 88 paıyzy egildi. Túsindirý jumystary júrip jatyr. Barlyq jaǵdaı baqylaýda», - dep túsindirdi Altaı Kólginov.