Koronavırýs: BQO-da jansaqtaý bólimshesinde jatqan 19 naýqastyń 18-i ekpe almaǵan
BQO densaýlyq saqtaý basqarmasy basshysynyń orynbasary Gúlnár Ábdirahmanovanyń óńirlik kommýnıkatsııalar qyzmeti alańynda ótken brıfıngide málim etkenindeı, sonyń ishinde bireýi bala bolsa, úsheýi – 65 jasqa deıingiler. 9-y – 65-ten, altaýy – 80 jastan asqandar.
Onyń aıtýynsha, osylardyń ishinde 17-si aýyr, ekeýi asa aýyr halde. Beseýi ınvazıvti jasandy tynys alý apparatyna, 8-i ınvazıvti emes osyndaı qurylǵyǵa, altaýy ottegi kontsentratoryna qosylǵan. Oǵan qosa úsh naýqastyń sozylmaly syrqaty bar.
G.Ábdirahmanovanyń sózine qaraǵanda, kúni búgin 465 naýqas ambýlatorlyq em alyp jatsa, sonyń 276-sy nemese 59,3 paıyzy Oral qalasynda.
Oblys boıynsha 14 ınfektsııalyq statsıonarda 174 adam em qabyldaýda. Aýrýhanalar 23,2 paıyzǵa tolǵan, bul ótken aptamen salystyrǵanda, 13,4 paıyzǵa tómen.
«Oblysta turǵyndardy vaktsınatsııalaý jumysy jalǵasýda. Osy kezge deıin 270 477 adam vaktsınanyń birinshi komponentin saldyrdy. Bul – jalpy jospardyń 65,3 paıyzy. Sondaı-aq 256 118-i ekinshi komponentpen de egildi. Pfizer kompanııasynyń «Komırnatı» vaktsınasyn 9 890 adam aldy, sonyń 5 147-si – jasóspirimder, 357-si – júkti jáne 4 386-sy – bala emizetin áıelder», dedi G.Ábdirahmanova.
Eske sala keteıik, budan buryn Batys Qazaqstanda 55 myńnan astam adamnyń revaktsınatsııadan ótkenin, karantın talabyn buzǵandarǵa 3 mln teńge aıyppul salynǵanyn jazǵan bolatynbyz.