Koronavırýs belgileri baıqalsa da dárigerge qaralmaı júre beretinder bar - dáriger

ÓSKEMEN. QazAqparat – Shyǵys Qazaqstan oblysy Jarma aýdany Shar qalalyq aýrýhanasynyń bas dárigeri Aıbek Qarsaqbaev azamattardy karantın shekteýlerin qatań saqtaýǵa shaqyrdy, dep habarlaıdy QazAqparat tilshisi.

«Koronavırýs pandemııasynyń bastalǵanyna birneshe jyl ótti. Alaıda qaýipti dert áli kúnge deıin aıylyn jıǵan joq. Kún saıyn ınfektsııa juqtyryp jatqandar kezdesedi. Onyń ishinde aýrýhanada aýyr jaǵdaıda jatqandar da bar. Buǵan sebep – turǵyndardyń aıtylǵan keńesterge qulaq aspaı, karantın shekteýlerin saqtamaýy», - dedi Aıbek Qarsaqbaev.

Onyń aıtýynsha, keıbir jandar aýrý belgileri baıqalsa da dárigerge qaralmaı júre beredi.

«Ondaı jaǵdaıda medıtsına qyzmetkerlerine birden júginý kerek. Em-domdy ýaqtyly alsańyz dertti jeńil ótkeresiz. Al koronavırýsty túbegeıli jeńýdiń jalǵyz joly – vaktsına. Búgingi tańda Shar qalasy boıynsha 10 996 adam ekpeniń birinshi komponentin saldyrǵan. Al 10 991 azamat vaktsınanyń eki komponentin de aldy. Sondaı-aq 2895 adam koronavırýsqa qarsy revaktsınatsııalaýdan ótti», - dedi bas dáriger.

Óz sózinde ol jurtshylyqqa vaktsına saldyryp, shekteý sharalaryn qatań saqtaýǵa shaqyrdy.