Koronavırýs: Ázerbaıjan eki túrli vaktsınany qoldanýǵa álemde alǵashqy bolyp ruqsat berdi

BAKÝ. AZERTAG - QazAqparat - Ázerbaıjan Respýblıkasynyń Densaýlyq saqtaý mınıstrligi el aýmaǵynda «Spýtnık V» jáne AstraZeneca vaktsınalaryn aralas qoldaný boıynsha klınıkalyq synaq ótkizýge ruqsat berdi. Klınıkalyq synaqtar aqpan aıynyń sońyna deıin bastalady. Bul týraly AZERTAG mınıstrliktiń baspasóz qyzmetine silteme jasap málim etti, dep habarlaıdy QazAqparat.

Aıta ketsek, «Spýtnık V» reseılik vaktsına bolsa, AstraZeneca – AstraZeneca kompanııasy men Oksford ýnıversıteti birlesip ázirlegen preparat.

Buǵan deıin N.F.Gamaleıa atyndaǵy Epıdemıologııa jáne mıkrobıologııa ǵylymı-zertteý ortalyǵy, Reseı tikeleı ınvestıtsııalar qory, AstraZeneca jáne «R-Farm» jańa koronavırýs ınfektsııasynyń (COVID-19) aldyn alý salasynda memorandýmǵa qol qoıǵan bolatyn jáne bul týraly ótken jyldyń jeltoqsan aıynda RF prezıdenti Vladımır Pýtınniń qatysýymen ótken keńeste jarııalanǵan edi.

Vaktsınalardy birge qoldanýǵa qatysty álemdegi alǵashqy tájirıbe 2020 jyldyń 24 jeltoqsanynda tirkelgen klınıkalyq synaq hattamasy aıasynda ótkizilgeli otyr.

Zertteý barysynda «Spýtnık V» jáne AstraZeneca vaktsınalaryn aralas paıdalanýdyń qaýipsizdigi men ımmýnogendikti baǵalaý kózdelgen. Zertteý baǵdarlamasy birneshe el aýmaǵynda 6 aıǵa sozylady. Zertteýdiń árbir baǵdarlamasyna 100 eriktiden jumyldyrý josparlanǵan.