Koronavırýs: Armenııada bilim mekemeleri men balabaqshalar jumys istemeıdi
Buǵan deıin COVID-19 Iran men Italııadan kelgenderden anyqtalǵan bolsa, jańa jaǵdaılar el ishinde anyqtalǵan.
«Jańadan tirkelgen eki naýqas ınfektsııalyq aýrýhanaǵa jatqyzyldy. Vırýsty juqtyrǵandar – buǵan deıin koronavırýs anyqtalǵan Echmıadzın qalasynyń turǵynymen baılanysta bolǵan tulǵalar. Olar ózge naýqastarmen birge oqshaýlandyryldy», - dedi Facebook-tegi paraqshasynda eldiń Densaýlyq saqtaý mınıstri Arsen Torosıan.
Sondaı-aq 12 naýryz kúni keshke elde koronavırýstyń taralýyna baılanysty bıliktegi «Azamattyq kelisim» partııasy premer-mınıstr Nıkol Pashınıannyń qatysýymen otyrys ótkizdi. Onyń nátıjesi boıynsha N.Pashınıan Facebook-tegi paraqshasynda eńbek demalysyn úzetinin, al Armenııa úkimeti jaǵdaıdy jan-jaqty baǵalaý úshin 13 naýryz kúni keńes ótkizetinin jazdy. Keńes qorytyndysy boıynsha budan arǵy sharalar jarııalanatyn bolady.
Osy rette, premer-mınıstr atap ótkendeı, 13 naýryz kúni barlyq bilim berý mekemeleri jáne balabaqshalar jumys istemeıdi. Ol sonymen qatar el azamattary syrqattyń qandaı da bir belgileri paıda bolǵan jaǵdaıda dereý mamandarǵa júginý qajetti týraly keńeske qulaq asa bermeıtinine ókinish bildirdi. Armenııa úkimetiniń basshysy halyqty sabyrlyqqa jáne eldegi jaǵdaıdy asyra aıtpaýǵa shaqyrdy.
Sońǵy málimetter boıynsha, elde jańa indetti juqtyrýdyń 6 oqıǵasy tirkeldi. Alǵashqy jaǵdaı 1 naýryz kúni Irannan kelgen Armenııanyń 29 jastaǵy azamatynan anyqtaldy. Onymen qarym-qatynasta bolǵan 31 adam Tsahkadzor qalasyndaǵy «Golden Palace» qonaqúıinde oqshaýlandyryldy.11 naýryzda koronavırýs Armenııanyń eki azamatynan (45 jáne 27 jastaǵy) jáne Italııanyń bir azamatynan (51 jasta) tabyldy. Úsheýi de Italııadan kelgen. 12 naýryzda taǵy eki adamda test oń nátıje kórsetti. Osy ýaqytta oqshaýlandyrylǵan adamdardyń jalpy sany – 88.