Koronavırýs: Anglııada jańa lokdaýn engiziledi
Ulybrıtanııanyń premer-mınıstri Borıs Djonson tún ortasynan bastap Anglııanyń barlyq aýmaǵynda engiziletin jańa shekteý sharalary týraly jarııalady.
Anglııadaǵy jańa erejeler:
Naýryz aıyndaǵy lokdaýn sekildi tótenshe jaǵdaılardy qospaǵanda, adamdarǵa úıden shyǵýǵa tyıym salynady
Tótenshe jaǵdaılarǵa medıtsınalyq qajettilik, azyq-túlik dúkenine barý, fızıkalyq jattyǵýlar, sondaı-aq úıden jumys isteı almaıtyndar úshin jumysqa barý kiredi
Seısenbiden bastap barlyq mektep pen kolledj (sırek jaǵdaılardy qospaǵanda) aqpan demalysyna deıin qashyqtan oqytýǵa kóshedi
Balabaqsha sııaqty mektep jasyna deıingi balalarǵa arnalǵan mekemeler ashyq bolady
Aldaǵy jazda jyldyq emtıhandar toqtatylady (nemese arnaıy erejeler boıynsha ótedi)
Ýnıversıtet stýdentteri demalystan stýdenttik qalashyqtarǵa oralmaıdy jáne oqýdy qashyqtan jalǵastyrady
Golf alańdary, tennıs korttary jáne ashyq sport alańdary sııaqty ashyq sport nysandary jabyq bolady
Áýesqoı sportshylarǵa arnalǵan is-sharalar toqtatylady, biraq kásibı sportshylarǵa, sonyń ishinde fýtbol premer-lıgasyna oıyndy jalǵastyrýǵa ruqsat etiledi
Premer-mınıstrdiń aıtýynsha, eger bári oıdaǵydaı bolsa, onda aqpan aıynyń ortasynda tórt basym toptyń barlyq ókili (oǵan qarttar úıinde turatyndar men osy mekemelerdiń qyzmetkerleri, 70 jastan asqan adamdar jáne medıtsına qyzmetkerleri kiredi) vaktsınanyń alǵashqy dozasyn alady.
Bıliktiń aıtýynsha, bul joǵary táýekel tobyna kiretin adamdardy qorǵaıdy jáne osylaısha birqatar shekteýlerdi alyp tastaýǵa kómektesedi.
Brıtanııada jetinshi kún qatarynan kúnine 50 myńnan astam jańa jaǵdaılar tirkelýde.Tipti keshe 58 myń indetke shaldyǵý jaǵdaıy tirkelip, rekord ornady. Dúısenbi kúni Anglııa aýrýhanalarynyń ózinde koronavırýs juqtyrǵan 26 myńnan astam patsıent boldy.
Oksford vaktsınasy
Ulybrıtanııa qalypty ómirge oralý úmitin joǵaltpaıdy. Al bul úmit halyqty jappaı vaktsınatsııalaýmen, atap aıtqanda Oksford ýnıversıteti men AstraZeneca kompanııasy ázirlegen preparatty qoldanýmen baılanysty. Ulybrıtanııa bul vaktsınany qoldanýdy maquldaǵan jáne ony qoldanýdy bastaǵan álemdegi alǵashqy el boldy.
Dúısenbide Oksford vaktsınasyn alǵan álemdegi alǵashqy patsıent 82 jastaǵy Braıan Pınker boldy, onyń búıreginde aqaý bar. Ol Oksford aýrýhanasynda gemodıalızde. Vaktsınatsııadan keıin ol aqpan aıynda áıeli Shırlımen birge úılený toıynyń 48 jyldyǵyn atap ótetinine úmit bildirdi.
Ulybrıtanııada qazirdiń ózinde jańa vaktsınanyń 530 myń dozasy bar. Henkok dúısenbide habarlaǵandaı, elde 700 egý ortalyǵy ashyldy, al aptanyń sońynda olardyń sany 1 myńnan asýy kerek. Borıs Djonson jeksenbide aldaǵy aılarda ondaǵan mıllıon brıtandyq vaktsınatsııalanatynyn atap ótti.
Ulybrıtanııa Oksford vaktsınasynyń 100 mıllıon dozasyna tapsyrys berdi. Bul 50 mıllıon adamdy vaktsınatsııalaýǵa jetkilikti.
Reseı: Peterbýrgte aýyrǵandar sany Máskeýdegiden de asyp tústi, Basılashvılı koronavırýs juqtyrdy
Reseıde jedel shtabtyń málimetinshe 19 qarashadan beri alǵash ret táýliktik ósim 24 myńnan az kórsetkishti 23 351-di kórsetti.
Sankt-Peterbýrgte aýyrǵandar sany alǵash ret Máskeýde anyqtalǵan jaǵdaılardan asyp tústi. Sankt-Peterbýrgte 3657 jańa jaǵdaı tirkelse, el astanasynda 3591 jańa derek anyqtaldy.
Reseıde koronavırýsqa shaldyqqandardyń jalpy sany 3,2 mln-nan asty.
Sankt-Peterbýrgte aýrýǵa shaldyqqandar arasynda Reseıdiń halyq ártisi Oleg Basılashvılı de bar. Ótken demalys kúnderi ol áıelimen birge aýrýhanaǵa jatqyzyldy.
Tokıo tótenshe jaǵdaı jarııalaýǵa daıyndalyp jatyr
Japonııada ınfektsııa juqtyrǵandar sanynyń kúrt artýyna baılanysty Tokıo men onyń mańyndaǵy qalalarda tótenshe jaǵdaı jarııalanýy múmkin.
NHK habar taratý korporatsııasynyń habarlaýynsha, Japonııada 31 jeltoqsanda aýrýǵa shaldyǵý jaǵdaılarynyń rekordtyq ósimi, ıaǵnı 4520 oqıǵa tirkelse, jeksenbide 3158 oqıǵa anyqtalǵan.
Buǵan deıin el bıligi jappaı vaktsınatsııa bastalatynyn málimdegen.