Koronavırýs: Almatyda birinshi eshelonda daıyndalǵan tósek-orynnyń 80 paıyzy toldy

ALMATY. QazAqparat - Birinshi eshelon boıynsha jasaqtalǵan tósek-orynnyń 80 paıyzy tolǵan, ol 5 statsıonarda ornalasqan. Bul týraly onlaın brıfıng barysynda Almaty qalasy qoǵamdyq densaýlyq basqarmasynyń ókili, joǵary medıtsına kolledjiniń dırektory Svetlana Sultanǵazıeva aıtty, dep habarlaıdy QazAqparat tilshisi.

30 naýryz kúni Almatyda koronavırýs ınfektsııasynyń 526 jańa jaǵdaıy tirkelgen, onyń 425-i - sımptomdyq belgileri bar jáne 101-i - sımptomsyz.

Bir táýlik ishinde – 306 naýqas qabyldansa, statsıonardan 209 naýqas shyǵarylǵan.

Svetlana Sultanǵazıevanyń aıtýynsha, Almatyda qazir 5 myńnan astam ınfektsııalyq tósek-oryn uıymdastyrylǵan. Onyń barlyǵy 3 eshelonǵa bólingen.

«Qazirgi ýaqytta ınfektsııalyq aýrýhanalarda koronavırýspen 2 793 adam jatyr. Onyń ishinde 109-y bala, asa aýyr jaǵdaıdaǵy naýqastar – 46. Birinshi eshelon boıynsha jasaqtalǵan tósek-orynnyń 80 paıyzy tolǵan, ol 5 statsıonarda ornalasqan. Ekinshi eshelon boıynsha 2400 tósek-oryn 15 medıtsınalyq uıymda jasaqtaldy, qazir onyń 43 paıyzy tolǵan. Úshinshi eshelon boıynsha 8 medıtsınalyq uıymda tósek-oryn uıymdastyryldy jáne onyń 14 paıyzy toldy», - deıdi ol.

Jalpy reanımatsııa jáne ıntensıvti terapııa bólimshesinde – 125 naýqas bar, ondaǵy bos tósek-oryn sany – 295.

Oǵan qosa «Halyq Arena» sport kesheninde 1000 oryn jasaqtalǵan , qazir onda 18 naýqas jatyr.