Koronavırýs: Aqmola oblysyndaǵy mektepter tekserilýde

KÓKShETAÝ. QazAqparat – Aqmola oblysynda qoǵamdyq top músheleri bilim berý nysandarynyń sanıtarlyq talaptarǵa saı bolýyna tekseris jumystaryn jalǵastyrýda. Bul týraly Şýche qalasyndaǵy mektepterge monıtorıng júrgizgen Aqmola oblysy boıynsha qoǵamdyq baqylaý tobynyń úılestirýshisi Olesıa Baımova aıtty, dep habarlaıdy QazAqparat tilshisi.

«Búgin Şýche qalasyndaǵy segiz mektepte monıtorıng júrgizdik. Tekseris kezinde synyptarda sanıtaızer men maskanyń, muǵalimder men oqýshylardyń qyzýyn baqylap otyratyn tirkeý jýrnalynyń, sondaı-aq, kvarts shamy men kestesiniń bolýyna nazar aýdaryldy. Baıqanymyzdaı, barlyq mektepter sanıtarlyq talaptarǵa saıǵa jumys isteýde», - dedi Olesıa Baımova.

Sonymen birge, ol qazirgi kezde óńirde karantındiń rejımniń kúsheıtilýine baılanysty mektepterde antıseptık, maska jáne ózge de qorǵanys zattarymen qamtamasyz etilýi, sondaı-aq, áleýmettik qashyqtyq, maska rejıminiń saqtalýyna erekshe kóńil bólinip otyrǵandyǵyn atap ótti.

«Oqýshylardy mektepke kirgeninen bastap, shyqqanyna deıin tekserip otyrady. Koronavırýs ınfektsııasynyń qaýpin oqýshylarda túsinedi. Ár synypta bolǵanymyzda oqýshylar arasynda áleýmettik qashyqtyq saqtalǵan, oqýshylar men muǵalimder maska taǵyp júredi. Tipti, ár synypta oqýshylarǵa qoldy qalaı jýý kerektigi týraly ereje de ilinip tur. Jalpy, mektepter maska, antıseptık jáne suıyq sabyndarmen qamtamasyz etilgen, qoımalarynda qajetti zattardyń jeltoqsan, qańtar aılaryna deıin jetkilikti qory jasalǵan», - dep tolyqtyrdy Olesıa Baımova.

Eske sala keteıik, aǵymdaǵy jylǵy tamyzdyń 11-inde Densaýlyq saqtaý mınıstri Alekseı Tsoı elimizdegi medıtsınalyq mekemelerdiń ishindegi jaǵdaıdy baqylaý boıynsha halyq belsendilerinen quralǵan qoǵamdyq baqylaý qurylatynyn atap ótken edi. Bul bastama QR Aqparat jáne qoǵamdyq damý mınıstrligi tarapynan qoldaý tapqan bolatyn.