Korol III Charlzdiń táj kııý rásimi qashan ótetini belgili boldy

LONDON. QazAqparat - Ulybrıtanııa jáne Soltústik Irlandııa Birikken koroldiginiń koroli ІІІ Charlzdiń taqqa otyrýyna oraı, 6-8 mamyr aralyǵynda merekelik sharalar ótedi, dep habarlaıdy QazAqparat tilshisi.

Táj kııý rásimi 6 mamyrda Vestmınster abbattyǵynda ótedi, onda korol men koroleva Býkıngem saraıynan sherýmen keledi. Rásimdi Kenterberı arhıepıskopi júrgizedi.

Rásim aıaqtalǵannan keıin monarh koroldik otbasynyń basqa múshelerimen birge sán-saltanatty sherýmen keri qaıtady.

Býkıngem saraıynda korol men koroleva koroldik otbasy múshelerimen birge balkonǵa shyǵyp, merekelik sharalardy aıaqtaıdy.

Kelesi kúni, 7 mamyrda Vındzor saraıynda álem juldyzdarynyń qatysýymen kontsert ótedi, ol tikeleı efırde kórsetiledi. VVS ótkizetin ulttyq daýys berý sharasy kezinde birneshe myń adam eki tegin bıletten alady.

Kontsert kezinde Ulybrıtanııanyń aıshyqty oryndarynda jaryq janyp turady. Búkil el boıynsha kóshelerde, baqtarda, saıabaqtarda jáne ózge de qoǵamdyq oryndarda kóńildi keshter uıymdastyrylady.

Merekelik sharalardyń sońǵy kúni, 8 mamyrda, «Zor kómek» atty volonterlik aktsııasy ótedi, ol azamattardy erikti bolýǵa yntalandyrýdy kózdeıdi.

Aıta keteıik, táj kııý – saltanatty dinı rásimder men merekeler ýaqyty. Bul – sımvolıkalyq shara. Óıtkeni, koroldiń ámirligi 2022 jyly 8 qyrkúıekte, onyń anasy, patshaıym ІІ Elızaveta qaıtys bolǵannan keıin taqqa otyrǵan kezinde bastalǵan.

ІІ Elızaveta 70 jyl 214 kún patshaıym bolyp, el tarıhynda esimi bılikte eń uzaq ýaqyt otyrǵan Brıtan monarhy retinde qaldy. Onyń taqqa otyrý rásimi 1953 jyldyń 2 maýsymynda Vestmınster abbattyǵynda ótken.

Eske salsaq, Ulybrıtanııa patshaıymy II Elızaveta Balmoral saraıynda 96 jasynda qaıtys boldy.

Foto: Getty Images