Kórnekti jazýshy Sábıt Dosanov Mahmud Qashqarı atyndaǵy halyqaralyq syılyqtyń ıegeri atandy (FOTO)

ALMATY. QazAqparat - Almatyda ál-Farabı atyndaǵy Qazaq ulttyq ýnıversıtetinde kórnekti jazýshy, QR Memlekettik syılyǵynyń ıegeri Sábıt Dosanovpen kezdesý ótti.

Oǵan ýnıversıtet basshylyǵy jáne professor-oqytýshy quramymen qatar, Qazaqstannyń tanymal aqyn-jazýshylary: Myńbaı Rásh, Dýlat Isabekov, Ǵalym Jaılybaı, Ázirbaıjannyń kórnekti aqyny Elhan Zal Qarahanly, Almaty qalasy ákimdiginiń  jastar saıasat basqarmasynyń basshysy Nurbolat Syzdyqov, Reseı qazaqtarynyń atynan Dámeli Tasmaǵanbetova jáne daraboz kúıshi-kompozıtor Shámil Ábiltaev qatysty. 

Óziniń alǵy sózinde ál-Farabı atyndaǵy QazUÝ rektory, akademık Ǵalymqaıyr Mutanuly jazýshynyń qazaq ádebıetiniń damýyna sińirgen eńbegin erekshe atap ótti.

«Búgingi kezdesýdiń qazaq ádebıetiniń kórnekti ókili, belgili jazýshy, dramatýrg Sábıt Dosanovpen bolýy kezdeısoq emes. Ol - bizdiń ýnıversıtettiń 1964 jylǵy túlegi. Sodan beri ol, ózi tańdaǵan sóz ónerinde shyǵarmashylyqtyń shyńyn baǵyndyryp, ýnıversıtetimizdiń atyn tek jaqsy jaǵynan shyǵaryp júrgen qazaq halqynyń daryndy tulǵasy» - dedi ol.

Kezdesý barysynda Mahmud Qashqarı atyndaǵy halyqaralyq qordyń prezıdenti, Ázirbaıjannyń kórnekti aqyny, «Shynar» jýrnalynyń bas redaktory Elhan Zal Qarahanly Sábıt Dosanovqa «Aq Arýana» shyǵarmasy úshin Mahmud Qashqarı atyndaǵy halyqaralyq syılyqty tabystady.

Sonymen qatar, eki el arasyndaǵy týystyq qarym-qatynasty atap ótip, óziniń «Ázirbaıjan men Qazaqstan» atty óleńin oqyp berdi.

Ál-Farabı atyndaǵy QazUÝ baspasóz qyzmetiniń habarlaýynsha, Elhan Zal Qarahanly «Shynar» jýrnalynyń basty betin Sábıt Dosanovqa arnap, onyń «Aq Arýana» kitabyn ázirbaıjan tiline aýdarǵan.

Aıta ketelik, Mahmud Qashqarı atyndaǵy halyqaralyq qor jumysynyń basty maqsaty - túrki halyqtarynyń mádenıeti men ádebıetin búkil álemge taratý, jer betindegi barlyq halyqtar arasyndaǵy qarym-qatynasty nyǵaıtý. Mahmud Qashqarı atyndaǵy syılyq osy maqsatqa jetýge óz shyǵarmalary men eńbekteri arqyly ádebıet, ǵylym men óner salasynda úles qosyp júrgen azamattarǵa beriledi. Mundaı bedeldi syılyqpen budan buryn qazaqtyń kórnekti aqyndary Aqylbek Shaıahmet pen Oljas Súleımenov marapattalǵan bolatyn.