Kórnekti qoǵam jáne memleket qaıratkeri Seıitqalı Meńdeshevtiń 140 jyldyǵyna oraı jınaq shyqty

NUR-SULTAN. QazAqparat – Almatyda kórnekti qoǵam jáne memleket qaıratkeri, avtonomııaly Qazaq Respýblıkasy Ortalyq Atqarý Komıtetiniń tuńǵysh tóraǵasy Seıitqalı Meńdeshevtiń 140 jyldyǵyna oraı «Seıitqalı Meńdeshev. Qujattary men materıaldar jınaǵy» atty kitaptyń tusaýkeser rásimi ótti, dep habarlaıdy QazAqparat.

Seıitqalı Meńdeshev Keńes dáýirindegi qazaq memlekettiliginiń qalyptasýy men damýyna úlken úles qosqan biregeı tulǵa, qazaq jeriniń tutastyǵyn qalpyna keltirý, keńestik bılik organdaryn jergiliktendirý jolynda, 1921-1922 jyldardaǵy ashtyqqa qarsy kúresti uıymdastyrýǵa, qazaq aǵartý jáne ǵylym salalarynyń negizin qalaýǵa eren eńbek sińirgen qaıratker.

«Kitapty shyǵarýdaǵy maqsat – Qazaq respýblıkasynyń qurylýy men qalyptasýyna eren eńbek sińirgen Seıitqalı Meńdeshevtiń tarıhı tulǵasy, onyń qazaq halqyna sińirgen qyzmeti arqyly HH ǵasyrdyń 20-30 jyldaryndaǵy tarıhtyń aqtańdaq betterin ashý, otandyq tarıhı tulǵataný ǵylymyna úles qosý, óskeleń urpaqty otansúıgishtik pen adamgershilikke tárbıeleý, Alash qaıratkerlerin eske alyp, olardyń murasyn jastarǵa jáne búkil álemge pash etý»,-deıdi sharany uıymdastyrýshylar.

S. Meńdeshevtiń 140 jyldyq mereıtoıyna tartý bolǵan jınaq QR Ortalyq memlekettik arhıviniń dırektory, tarıh ǵylymdarynyń kandıdaty, ıdeıa avtory S. Shildebaıdyń ǵylymı jetekshiligimen qurastyrylǵan.

Osy jınaq arqyly Qazaqstan Respýblıkasy men Reseı Federatsııasynyń arhıvterinen anyqtalǵan S. Meńdeshevtiń qujattary men sóılegen sózderi, merzimdi basylym betterinde jaryq kórgen maqalalary tuńǵysh ret jınalyp, ǵylymı aınalymǵa engizilip otyr. Jınaqqa 93 tarıhı qujat, S. Meńdeshevtiń 44 maqalasy men 22 fotosy engizilip, fotodaǵy kóptegen qaıratkerlerdiń kim ekendigi tuńǵysh ret ǵylymı turǵydan anyqtalǵan. Reseı men Qazaqstan arhıvterinen jınalǵan tarıhı fotolardyń 10-nan astamy buryn-sońdy belgisiz bolyp kelgen sýretter.

Tusaýkeser rásimin Almaty qalasyndaǵy «Ǵylym Ordasynda» QR Ortalyq memlekettik arhıvi, Sh.Sh. Ýálıhanov atyndaǵy Tarıh jáne etnologııa ınstıtýty men «Ǵylym Ordasy» RMM birlese otyryp uıymdastyrdy.

Sharaǵa otandyq jáne sheteldik tarıhshy ǵalymdar, stýdentter, magıstranttar, doktoranttar jáne BAQ ókilderi, C.Meńdeshevtiń týystary men jerlesteri, sondaı-aq, osy taqyrypqa qyzyǵýshylyq tanytqan azamattar qatysty.