«Qorqyt sazy» folklorlyq halyq ansambli kontsert berdi

QAZALY. QazAqparat – Qyzylorda oblysynyń Qazaly aýdanynda «Qorqyt sazy» folklorlyq halyq ansambli jurtshylyqqa óz ónerin usyndy, dep habarlaıdy QazAqparat tilshisi.

Roza Baǵlanova atyndaǵy aýdandyq mádenıet ortalyǵynda ótken shara Tuńǵysh Prezıdent - Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasy aıasynda qolǵa alyndy.

«Qorqyt sazy» folklorlyq halyq ansambli 1986 jyly aýdandyq Mádenıet úıi janynan qurylǵan. Óner ujymy jyl saıyn aýdan halqy aldynda esep berýdi dástúrge aınaldyrǵan. Ansamblge Qazaqstan Respýblıkasy kompozıtorlar odaǵynyń múshesi, QR mádenıet qaıratkeri Sáýken Álish jetekshilik etedi. Qazirgi tańda «Qorqyt sazy» baǵyndarǵan belester az emes, oblystyq, respýblıkalyq baıqaýlardyń laýreaty atanyp úlgergen. 1994 jyly QR Mádenıet mınıstrliginiń Qaýlysymen ansamblge «halyqtyq» dárejesi berildi. Ujymnyń repertýarynda kúni búginge deıin Syr óńirindegi Aral, Qazaly, Aqtóbe jáne qaraqalpaq halqyna máshhúr bolǵan Myrza men Jaldybaıdyń, Qazanǵaptyń, Daırabaıdyń kúılerimen qatar, halyq ánderi jáne Qazaqstan kompozıtorlary men jergilikti sazgerlerdiń shyǵarmalary bar.

Aýdandyq mádenıet ortalyǵyna jınalǵan kórermender ansambldiń oryndaýynda «Qarajorǵa», «Yńǵaı kók», «Mamyq», «Balbyraýyn» kúılerin, «Qazaq eli tolǵaýy», «Adam joq turatuǵyn bir qalypta», «Qypshaqtar», «Burań bel» sııaqty ánderin tyńdady.