Qorqyt ata, Oralhan Bókeı, Anadoly jáne Shekspır: elordanyń jańa kósheleri
«№ 28/1 jobalyq kóshege Azııanyń batys bóligindegi túbek, qazirgi Túrkııa aýmaǵynyń ortańǵy bóligi Anadoly ataýyn berý usynylady. Bul usynys Memleket basshysynyń Túrkııaǵa resmı sapary aıasynda berilgen tapsyrma. Túrik elinde de Qazaqstannyń aqyn-jazýshylaryna berilgen kóshe attary men eskertkishter az emes. Byltyr jeltoqsanda Ankara qalasynda ult ustazy Ahmet Baıtursynulynyń eskertkishi ornatylǵanyn jaqsy bilesizder», - dedi Astana qalasy tilderdi damytý jáne arhıv isi basqarmasynyń basshysy Sáken Esirkep elorda máslıhatynyń otyrysynda.
Odan bólek, spıkerdiń málimetinshe, elordada Qorqyt ata kóshesi paıda bolmaq.
«E33 jobalyq kóshege túrki halyqtaryna ortaq uly oıshyl, jyraý Qorqyt Atanyń esimin berý usynylady. Burynǵy Qorqyt kóshesi «Baıqońyr» aýdanynda ornalasqan bolatyn, alaıda qurylystyń qarqyndy júrgizýiline baılanysty ol kóshede de úıler salynǵan. Burynǵy Qorqyt ata kóshesi nebári 50 metrge ǵana jýyqtaıtyn kóshege aınalǵan. Sondyqtan tek qazaqqa ǵana emes tutas túrki jurtyna ortaq tulǵanyń esimin «Nura» aýdanyndaǵy jańadan salynǵan kóshelerdiń birine aýystyryp otyrmyz», - deıdi ol.
Sonymen qatar, basqarma basshysy elordadaǵy ındýstrııalyq parkte ornalasqan birneshe jobalyq kóshege jer-sý ataýlaryn berýdi usyndy.
«Qazir osy óndiristik aımaqtaǵy jobalyq kóshelerdiń aty bolmaǵasyn adamdar kartaǵa Ýıllıam Shekspır, Leonardo da Vınchı degen sııaqty attardy qolmen engizip, jazyp qoıǵan. Halyq shynynda da osy kósheler atalǵan sheteldik tulǵalardyń esimimen atalǵan dep oılap júr. Sondyqtan elimizdegi tarıhı jer-sý attaryn berip, kartaǵa sol ataýlardy engizý qajet degen sheshimge keldik», - deıdi Sáken Esirkep.