«Qorqyt ata» áýejaıynyń jańa termınaly demeýshi esebinen salynady

ASTANA. QazAqparat – Qyzylorda oblysynyń ákimi Nurlybek Nálibaev ortalyq kommýnıkatsııalar qyzmetinde ótken brıfıngide jergilikti kásipkerlerdiń óńirdi damytýǵa qosyp jatqan úlesine toqtaldy, dep habarlaıdy QazAqparat tilshisi.

«Syr óńirindegi jergilikti kásipkerler, oblystan shyqqan metsenattar qaıyrymdylyq sharalaryna, týǵan jerin túletip, kórkeıtýge bar kúsh-jigerlerin salýda. Atap aıtqanda, Qyzylorda qalasynda belgili kásipker, metsenant Marat Dúısenbaevtyń demeýshiligimen quny 1,5 mlrd teńge bolatyn «Anaǵa taǵzym» ortalyǵy salynýda. Bolat Ótemuratov qory arqyly «Qorqyt ata» áýejaıynyń jańa termınalyn salýǵa 15 mlrd teńge bólindi», – dedi oblys ákimi.

Nurlybek Nálibaev byltyr Jańaqorǵan aýdanynda demeshýiler esebinen quny 790 mln teńge bolatyn zamanaýı demalys parki, Syrdarııa aýdany Naǵı Іlııasov aýylynda quny 450 mln teńge bolatyn «Eńbekshiler parki» boı kótergenin eske saldy.

«Al Aral aýdanynyń Toqabaı aýylynda jeke ınvestor esebinen apatty mekteptiń ornyna jańasy salynýda. Quny 500 mln teńge bolatyn bilim oshaǵy tamyz aıynda paıdalanýǵa berilmek.

Budan bólek, 7 myń adamǵa arnalǵan «Qaısar» fýtbol komandasynyń jańa stadıony boı kóteredi.

«Qazgermunaı» ulttyq kompanııasymen kelisim nátıjesinde Qyzylorda qalasynda quny 2 mlrd 500 mln teńgege zamanaýı úlgidegi «Oqýshylar saraıynyń» jobasy bastalady.

Aımaq halqy atynan osy ıgi bastamalarǵa qoldaý bildirgen demeýshilerge alǵys aıtamyz», – dedi aımaq basshysy ákimi.