Qorqyt ata atyndaǵy Qyzylorda ýnıversıteti álemniń úzdik ýnıversıtetteriniń tizimine endi
2022 jyly Azııanyń úzdik ýnıversıtetteri reıtınginde TOP-551-600 oryn alǵan ýnıversıtettiń 85 jyldyq tarıhy bar. 2023 jyly álemdik pozıtsııaǵa kóterilip, TOP-1200-1400 oryndy ıemdendi.
Búginde ýnıversıtet 113 baǵdarlama boıynsha bilim beredi. 10 myńnan astam stýdent bilim alyp jatqan ýnıversıtette 10 birlesken jáne qos dıplomdyq baǵdarlama, 6 halyqaralyq jáne 16 granttyq joba aıasynda ǵylymı-zertteý jumystary júzege asyrylady. Sheteldik oqytýshylar men akademııalyq utqyrlyq baǵdarlamasy boıynsha bilim alatyn stýdentterdiń sany jyldan-jylǵa artyp keledi.
2022 jyly alǵash ret «500 ǵalym» jobasy boıynsha 6 oqytýshy sheteldik joǵary oqý oryndarynda ǵylymı tájirıbeden ótti (Germanııa, AQSh, Reseı, Belarýs), al 2023 jyldan bastap 14 ǵalym Germanııa, Ulybrıtanııa, Shveıtsarııa, Reseı, Ázerbaıjan elderindegi joǵary oqý oryndaryna baryp, tájirıbe almasady. Olar – fızıka, arheologııa, sý resýrstary, jylý energetıkasy jáne jańartylatyn energııa kózderi, qurylys, shet tilderi, pedagogıka jáne psıhologııa salasyndaǵy jetekshi mamandar.
Ýnıversıtette jas ǵalymdarǵa grant berý, ǵylymı jýrnaldardaǵy jarııalanymdar úshin yntalandyrý, jalaqyny kóterý, zerthanalar men oqý kabınetterin zamanaýı qural-jabdyqtarmen jańartý, ǵylymda joǵary jetistikteri bar sheteldik mamandardy shaqyrý qarastyrylǵan.
2023 jyly Qyzylorda qalasynda ІT-tehnologııalar joǵary mektebin ashý maqsatynda Seýl ulttyq ǵylym jáne tehnologııa ýnıversıtetimen kelisimge qol qoıyldy.