«Qorqorǵa qul bolǵandar sany artyp keledi» -respýblıkalyq basylymdarǵa sholý

ASTANA. 27 shilde. QazAqparat - Qazaq aqparat agenttigi 27 shilde, sársenbi kúni respýblıkalyq basylymdarda shyqqan ózekti materıaldarǵa sholýdy usynady.

***

Premer-Mınıstr Kárim Másimovtiń tóraǵalyǵymen ótken keshegi Úkimet otyrysynda mádenıet salasynyń jaı-kúıi men elimizdiń áleýmettik-ekono­mı­ka­lyq damýynyń ústimizdegi jyldyń birinshi jartyjyldyǵyndaǵy qorytyndysy qaraldy. Kóterilgen máseleler boıynsha Mádenıet mınıstri Muhtar Qul-Muhammed pen Ekonomıkalyq damý jáne saýda mınıstri Qaırat Kelimbetov baıandama jasady. Osyǵan oraı «Egemen Qazaqstan» gazetindiń búgingi sanynda «Mádenıet mándi bolsa, ómir sándi» degen taqyryppen kólemdi maqala jarııalandy. Basylymnyń atap ótýinshe, alqaly jıyndy qorytyndylaǵan Úkimet basshysy Kárim Másimov Elbasynyń Úkimetke bergen eń basty tapsyrmasynyń biri - ekonomıkalyq damýdy 7 paıyzdyq deńgeıden kemitpeı ustap otyrý ekendigin atap ótip, osyǵan qol jetkizýdiń keshendi sharalary belgilenip otyrǵandyǵyn taǵy bir eske salǵan.

Elordada bir mezette 5 myń musylman minájat etetin úlken meshit salynyp bitýge taqaý, qurylys jumystary qarqyndy júrip jatyr. El Táýelsizdiginiń 20 jyldyq mereıtoıyna tartý bolǵaly otyrǵan nysan jaıynda «Egemen Qazaqstan» gazetiniń búgingi nómirinde «Elordadaǵy ortalyq meshit» degen taqyryptaǵy maqalada egjeı-tegjeıli baıandalǵan. «Ǵımarattyń jalpy aýdany 17,7 myń sharshy metr, al jalpy qurylys aýmaǵy 20,6 myń sharshy metrdi quraıdy. Meshit keshenine meshittiń ózi, oqý-aǵartý toby, quran oqıtyn zal, meıramhana, as bólmesi, erler men áıelderge arnalǵan dáret alatyn oryn, Imam oryn-jaı­la­ry, nekelesý men vıp oryn­dary kiredi», - dep jazady basylym.

***

«Qoǵamdyq oryndarda temeki tartýǵa tyıym salynǵaly beri kópshiliktiń qorqorǵa degen áýesi artyp keledi. Kezinde shyǵys ertegilerinen ǵana kóretin qorqor shirkinniń búginde shyndyqqa aınalǵan ras. Áp-sátte «modaǵa» enip, qumarlardyń qatary tipten ósip ketti. Qazir qaladaǵy kez kelgen dámhana, meıramhanalarda «temeki tartýǵa bolmaıdy» dep jazyp qoıǵanymen, qorqorǵa kelgende kóbisiniń jibi bosap ketedi. Tipti osy arqyly klıentterin kóbeıtýdi kózdep, neshe atasyn usynatyndardyń da qatary qalyńdaı túsýde», - dep jazady «Alash aınasy» gazeti. Búginde qoǵamǵa dendep bara jatqan osynaý bir dert jaıynda egjeı-tegjeıli bilgińiz kelse, «Qorqorǵa qul bolǵandar sany artyp keledi» degen maqalaǵa kóz júgirtińiz.

Taıaýda elordaǵa is-saparmen kelgen Iman Valerııa Porohova «Terrorızm: oǵan qarsy turý máseleleri» atty konferentsııaǵa qatysyp, Ulttyq qaýipsizdik komıtetiniń qyzmetkerlerine dáris oqyǵan bolatyn. Oraıy kelgende «Alash aınasy» gazetiniń tilshisi Quran Kárimdi orys tiline tárjimalap, ıslam máselelesin kóterip júrgen Iman Valerııamen shaǵyn suhbat aldy. Gazettiń búgingi sanynda ekeýara áńgime «Qazaqqa arabtyń ıdeologııasyn aralastyrý - beıbastyq» degen taqyryppen berilip otyr. AQSh-tyń Qazaqstandy lańkestik qaýipi bar elderdiń tizimine engizýine qatysty qoıylǵan saýalǵa ol: «Búginde Eýropa elderiniń kez kelgen máselege múldem basqa, ózindik kózqarasy bar. Sondyqtan AQSh-tyń osy sııaqty málimdemelerimen kelispeımin», - dep jaýap beripti.

***

Bul kúnderi álemniń barlyq memleketteri 2012 jyly Londonda ótetin jazǵy Olımpıada oıyndaryna qyzý ázirlik júrgizýde. Qazirdiń ózinde keıbir sport túrlerinen joldamaǵa ıelik etken sportshylardyń esimderi belgili boldy. Alaıda irikteý osymen ǵana shektelmeıdi. Alda áli kóptegen dúbirli dodalar bar. Jalpy alǵanda lıtsenzııalyq jarystar kelesi jyldyń bel ortasyna deıin jalǵasady. Sol tartysta baǵy janǵandar Tumandy Albıon elinde alaýy tutanatyn ǵalamdyq oıyndarda baq synaý qurmetine ıe bolady. Tórt jylda bir márte ótetin osy baıraqty básekede sportshylarymyzdyń jeńis tuǵyryna kóterilýi úshin múmkindikteri qandaı degen saýalǵa «Aıqyn» gazetindegi «Londonda bizdi ne kútip tur?» degen maqalada jaýap izdelgen.

Qostanaı oblysyndaǵy Áýlıekól aýdanynyń Qajeeva degen turǵyny zeınetaqyǵa erterek shyǵý úshin «ádemi ádis» taýypty. Qurmetti zeınetkerlik demalysqa shyǵý úshin qyryqqa tolmaǵan tolyqsyǵan jas áıel tólqujatqa óziniń famılııasyn ózgertip, jasyn ulǵaıtyp jazǵan eken. Bul jaıynda «Aıqyn» gazetiniń búgingi sanyndaǵy «Eń jas «zeınetker» Qostanaıda turady» degen maqalada egjeı-tegjeıli baıandalǵan. «Jalǵan zeınetkerdiń jazasyn sot anyqtaıtyn bolady. Al jas áıeldi eki ret «qartaıtyp», jasyn on jastan eki márte ulǵaıtqan «syıqyrshy» tólqujatshynyń taǵdyryn qarjy polıtsııasynyń tergeý bólimi sheship jatqan kórinedi», - dep jazady basylym.

***

«Kazahstanskaıa pravda» gazetiniń jazýynsha, keshe QR Memlekettik hatshysy Qanat Saýdabaev Qazaqstan Respýblıkasyndaǵy Norvegııa Koroldiginiń elshiliginde bolyp, norvegııa halqyna, lańkestik aktiden qaza bolǵandardyń týystary men jaqyndaryna kóńil aıtty. Qazaqstan ótken jyldar ishinde osyndaı zulymdyqpen kúres jónindegi halyqaralyq kúshterdiń mańyzdy ári júıeli jaqtaýshysy bolyp kele jatqandyǵyn aıtqan ol: «Osynaý qıyn kúnderi biz norvegııalyqtarǵa rýhynyń myqty bolǵanyn tileımiz», - dedi. Sonymen qatar Q. Saýdabaev elshilikte ashylǵan Norvegııadaǵy teraktiden qaza bolǵandardy eske alý jáne kóńil aıtý kitabyna óziniń kóńilin bildirip, jazba qaldyrdy.