Qorqyt ata áýejaıynyń jańa termınaly salynyp jatyr
«Qorqyt ata atyndaǵy áýejaı — Qazaqstandaǵy kóne nysandardyń biri. Áýejaıda jańa termınal salynyp jatyr. Qurylys bitkennen keıin nysan halyqaralyq reısterdi qabyldaı ala ma?» — dep suraq qoıdy tilshiler Ortalyq kommýnıkatsııalar qyzmetinde ótken baspasóz máslıhatynda.
«Shynymen de bizdiń termınalymyz eski. Biraq ótken jyly men osy qyzmetke kelgende demeýshilerdiń kómegimen 100 mln teńgege qazirgi eski termınaldy jóndedik. Qazir jaǵdaı jaqsy, kelgen qonaqtardy qabyldap jatyrmyz. Bıyl aqpanda jańa termınaldyń qurylysy bastaldy. Kelisimen jerlesemiz Bolat Ótemuratovqa habarlastyq. Memleket basshysy da tapsyrma bergenin bilesizder, azamattar týǵan óńirine kómektesýi kerek. Bolat Ótemuratovtyń qory joba jasap, aqpanda jańa termınaldyń qurylysyn bastadyq. Quny — 15 mlrd 700 mln teńge», — dep jaýap berdi Nurlybek Nálibaev.
Ákimniń aıtýynsha, jańa termınal qurylysy aldaǵy mamyr aıynda aıaqtalyp, el ıgiligine beriledi dep josparlanyp otyr.
«Keshe bizge kólik mınıstri Marat Qarabaev arnaıy issaparmen keldi jáne jańa termınaldyń qurylysymen tanysty. Sol kezde áýe reısterin kóbeıtý týraly usynysymyzdy aıttyq. Ókinishke qaraı, qazir tek Astana men Almaty qalasyna ǵana reıster ashylǵan. Kúnine 3-4 reıs qatynap jatyr. Biz sony kóbeıtý máselesin kóterdik. Óıtkeni áýe reısterine suranys óte kóp. Sondaı-aq basqa óńirler, basqa kórshi memlekettermen jumys istep, jańa reıs ashý jóninde usynysymyzdy aıttyq. Mınıstr bizdi qoldady. Bul termınaldyń ereksheligi — memlekettik menshikte. Óıtkeni keı adamdar termınaldy Bolat Ótemuratovtyń qory salyp jatqandyqtan ol jekemenshikte bolady dep oılap qalýy múmkin. Qazir de, aldaǵy ýaqytta da bul nysan memlekettik menshikte bolady. Ol tek demeýshilikpen bizge nysandy salyp jatyr», — dep túsindirdi oblys basshysy.
Buǵan deıin Nurlybek Nálibaev «Qyzylorda-Jezqazǵan» avtojolynyń jóndelip jatqanyn aıtqan edi. Osy joldy jańǵyrtý aıaqtalsa, Astanaǵa jetý ýaqyty 11 saǵatqa deıin qysqarady.