Qorǵastyń enshiles kompanııasy báseke týraly zańdy aıaqasty etken
22:49, 17 Jeltoqsan 2024
<p>TALDYQORǴAN. KAZINFORM - «Qorǵas» halyqaralyq shekara mańy yntymaqtastyǵy ortalyǵy «AEA Basqarýshy kompanııasy» AQ-nyń enshiles kompanııasy «Qorǵas-Kommerts» JShS-niń básekelestikti qorǵaý týraly zańnamany buzǵany belgili boldy. Bul týraly Básekelestikti qorǵaý jáne damytý agenttigi Jetisý oblysy boıynsha departamentiniń mamandary málimdedi.</p>
Departament ókilderiniń aıtýynsha, «Qorǵas-Kommerts» JShS konkýrstyq irikteý ótkizbesten, «Qorǵas» HShYO aýmaǵynda Qytaı bóliginen kelgen jolaýshylardy tasymaldaý boıynsha «Silk Road Starlight Tour» JShS-men konsortsıým týraly shart jasasqan. Bul áreket bir kásipkerge basymdyq berip, basqa qatysýshylardy tenderge qatysý múmkindiginen aıyrǵan.
«Bul bir kompanııanyń negizsiz artyqshylyqqa ıe bolýyna jol ashyp, Kásipkerlik kodekstiń 194-babynyń talaptaryn buzdy. Bizdiń habarlamaǵa sáıkes, kelisim-shart buzylyp, naryqtaǵy básekelestik qalpyna keltirildi», – dep habarlady departament mamandary.
Eske salaıyq osyǵan deıin Jetisýda aýdıt teksergen memlekettik satyp alýdyń 92%-ynan kemshilik anyqtalǵanyn jazǵanbyz.