«Qorǵas» ortalyǵy 15 aqpanǵa deıin jabyldy

TALDYQORǴAN. QazAqparat - Koronavırýs indetinen saqtyq sharalary Almaty oblysynda da kúsheıtildi. Osyǵan baılanysty «Qorǵas» halyqaralyq shekara mańy yntymaqtastyq ortalyǵy jumysyn ýaqytsha toqtatty. 15 aqpanǵa deıin atalǵan ortalyq jabyldy, dep habarlaıdy QazAqparat tilshisi.

Almaty oblysy aýmaǵynda Qytaımen shekaralas 6 keden beketi bar. Solardyń barlyǵynda qazir baqylaý kúsheıtilgen. Al «Qorǵas» halyqaralyq shekara mańy yntymaqtastyq ortalyǵynyń jumysy ýaqytsha toqtatyldy.

«15 aqpanǵa deıin «Qorǵas» halyqaralyq shekara mańy yntymaqtastyq ortalyǵy jabyldy. Qajet bolǵan jaǵdaıda merzim ýaqyty uzartylýy múmkin»,-dedi Almaty oblysy ákiminiń baspasóz hatshysy Ǵalymurat Júkel.

Bul keden beketine jaı kúnderi Qazaqstan tarapynan 3,5 myń adam kirip-shyǵady. Demalys kúnderi olardyń sany bes myńǵa jetedi. Jalpy Qytaı halqy shyǵys kúntizbesimen jańa jyldy atap óter ýaqytta bul jer eki aptaǵa jabylady. Al qazirgi jaǵdaıǵa baılanysty oblys ákiminiń uıǵarymymen beket jumysy 15 aqpanǵa deıin toqtatyldy.

«Ár bekette oqshaýlaý bólmeleri bar. Bólmeler 2-3 tósek oryn jáne basqa da qajet zattarmen jabdyqtalǵan. Sondaı-aq medıtsınalyq pýnktiler jumys istep tur. Mamandar obaǵa qarsy arnaıy kostıýmdermen qamtamasyz etilgen», - dedi Almaty oblysy ákiminiń orynbasary Batyrjan Baıjumanov.