«Qorǵas» isinde mıllıondaǵan qarjynyń múlkine tyıym salyndy
«Almaty qalasynyń prokýrory aıyptaý qorytyndysyn bekitkennen keıin is ústimizdegi jyldyń 12 sáýirinde Almaty qalasynyń qylmystyq ister boıynsha mamandandyrylǵan aýdanaralyq áskerı sotyna máni boıynsha qaraý úshin joldandy. Aıyptalýshylarǵa jáne olardyń qorǵaýshylaryna kólemi 35 tomdy quraıtyn aıyptaý qorytyndylary tabys etildi. Sotqa túsken qylmystyq isterdiń kólemi 1576 tomdy qurady. Tergeý barysynda ulttyq qaýipsizdik jáne kedendik baqylaý organdarynyń laýazymdy tulǵalary qoldaý kórsetken uıymdasqan qylmystyq qoǵamdastyqtyń qylmystyq kestesi ashyldy. Olar ózderiniń qyzmettik ókilettikterin paıdalana otyryp, «Qorǵas», «Qaljat» jáne «Dostyq» keden beketteri arqyly kontrabandalyq taýarlardy kedergisiz ótkizýdi qamtamasyz etken»,-delingen QR Bas prokýratýrasynyń habarlamasynda.
Qytaıdan Qazaqstanǵa taýarlardy kontrabandalyq jolmen kirgizý, qylmystyq jolmen tabylǵan aqshalaı qarajatty alý jáne zańdastyrýdyń shemasy ashylyp, aıypty tulǵalar anyqtaldy. Keden organdarynyń qorytyndysy boıynsha 2011 jyly ákelingen jáne ustalǵan kontrabandalyq júktiń quny 1,5 mlrd. teńgeni quraǵan.
Uıymdasqan qylmystyq qoǵamdastyqtyń baqylaýyndaǵy 34 kásiporyn anyqtaldy, olar jalǵan tulǵalardyń atyna rásimdelgen jáne olardyń meken-jaıyna negizgi kontrabandalyq júk aǵymy jiberilgen. Sondaı-aq qylmystyq keste boıynsha qujattardy rásimdegen brokerlik kompanııalar anyqtaldy.
«Tergeý barysynda uıymdasqan qylmystyq qoǵamdastyqtyń 2 jetekshisi jáne qylmystyq jolmen tabylǵan aqshalaı qarajatty shoǵyrlandyrǵan 3 kassıri áshkerelendi. Qylmystyq qoǵamdastyqta atqarylatyn rólderine baılanysty is boıynsha jaýapkershilikke tartylyp otyrǵan tulǵalardyń qatarynan jalǵan ilespe, sondaı-aq kedendik qujattardy daıyndaýmen aınalysyp kelgen 6 broker, kontrabandalyq júkti alyp júrý tobynan 8 adam, QHR-dan kontrabandalyq júkti jiberýshi 1 adam, kedendik beketterde jalǵan qujattardy paıdalaný arqyly kontrabandalyq júkti kedendik tazartýdy júzege asyrǵan 8 aıyptalýshy anyqtaldy»,-dep atap ótilgen bul málimetterde.
Belgili bolǵandaı, atqarylǵan jumystardyń qorytyndysy boıynsha 67 jyljymaıtyn múlik nysanyna, 162 avtokólikke, sonymen qatar bank esep-shottarynda, seıf jáshikterinde saqtalǵan 69 mln. teńgege, 1,5 mln. AQSh dollaryna, 164 myń eýroǵa, quny 1,5 mln. teńgeni quraıtyn altynnyń 8 troıa ýntsııasyna (284,828 gramm), quny 2,6 mln. teńgeni quraıtyn platınanyń 10 troıa ýntsııasyna (311,035 gramm), quny 1,1 mln. teńgeni quraıtyn palladııdiń 10 troıa ýntsııasyna (311,035 gramm) tyıym salyndy.
Atap aıtqanda, aıyptalýshylardyń turǵyn úılerin tintý barysynda 10,2 mln. teńge, 354 myń AQSh dollary, 70 myń arab dırhamy, 52 myń reseı rýbli, 61 myń qyrǵyz somy, 5 myń aǵylshyn fýnt sterlıngi somasyndaǵy qolma-qol aqshalaı qarajat, sondaı-aq iri kólemdegi qundy zattar tárkilenip, tyıym salyndy.
Zańsyz tabylǵan qarajatty zańdastyrý kompanııalar jelisi arqyly, atap aıtqanda, «TAT Kredıt» kredıttik seriktestik» JShS arqyly júrgizilgen, onyń jetekshisi laýazymdy tulǵalar eńgizgen aqshalaı qarajattyń negizinde olarǵa Almaty jáne Astana qalalaryndaǵy turǵyn-úı keshenderindegi qymbat turatyn páterler jáne basqa múlikter satyp alýdy, olardyń jáne otbasy músheleriniń kartochkalyq esep-shottaryn toltyrýdy, sheteldik saparlaryn tóleýdi jáne basqa da sharalardy qamtamasyz etken kórinedi.
«Qazirgi ýaqytta aýyr jáne asa aýyr qylmystar jasaǵandary úshin 45 azamat qylmystyq jaýapkershilikke tartylyp otyr, olardyń arasynda ulttyq qaýipsizdik komıtetiniń 3 qyzmetkeri, keden qyzmetiniń 15 qyzmetkeri bar. Qylmystyq is boıynsha 42 aıyptalýshy tutqyndaldy, 3 tulǵaǵa qatysty «eshqaıda ketpeý týraly qolhat alý» túrindegi bultartpaý sharasy qoldanyldy. Bólek shyǵarylǵan qylmystyq is boıynsha 19 aıyptalýshyǵa izdeý jarııalandy.