«Qorǵas isi» ashyq ári obektıvti túrde qaralatyn bolady - Joǵarǵy sot tóraǵasy

ASTANA. 1 sáýir. QazAqparat - «Qorǵas isi» ashyq ári obektıvti túrde qaralatyn bolady. «KTK» telearnasynda ótken «Halyq qyzmetshisi» baǵdarlamasynda suhbat bergen elimizdiń Joǵarǵy sotynyń tóraǵasy Bektas Beknazarov osylaı málim etti.

«Qorǵas isi» sáýir aıynyń alǵashqy onkúndiginde sotqa túsýi tıis. Maǵan belgili bolyp otyrǵany, is materıaldary 1 614 tomdy quraıdy, qylmystyq iske 45 adam tartylǵan. Bular kedenniń, qarjy polıtsııasy organdarynyń jáne Ulttyq qaýipsizdik komıtetiniń jaýapty tulǵalary. Olardyń 43-i qamaýǵa alynǵan, 94 advokat olardy qorǵaýǵa alǵan. Іs boıynsha 600-den astam kýáger bar», - dedi B.Beknazarov.

Onyń atap ótýinshe, qazirgi ýaqytta «Qorǵas isin» qaraý úshin úlken zal daıyndaýda. Onda jýrnalısterge barlyq jaǵdaı jasalady. Joǵarǵy sottyń baspasóz qyzmeti sot úderisiniń barysy týraly aqparattardy jedel usynatyn bolady.