Qorǵas beketinen taýardy jasyryn alyp ótýge qoldanylǵan avtokólik tárkilendi
Jetisý oblysy boıynsha Memlekettik kirister departamentiniń málimeti boıynsha, 24 shildede «Qorǵas-ShHYO» keden beketinde QR azamatyna tıesili Audi 100 markaly avtokólikke kedendik baqylaý júrgizý kezinde salmaǵy 22,62 kg «ORIS» markaly 102 blok temeki buıymdary tabylady. Zańsyz taýar avtomobıl ishine, atap aıtqanda oryndyqtyń artqy jaǵy men bagaj bóligi arasynda, ıaǵnı izdeý qıyn jerde jasyrylǵan.
QR ÁQBtK-niń 549-babyna sáıkes, Eýrazııalyq ekonomıkalyq odaqtyń kedendik shekarasy arqyly ótkiziletin ne ótkizilgen taýarlardy kedendik baqylaýdan jasyrý, onyń ishinde taýarlardy tabýdy qıyndatatyn qupııa oryndardy ne basqa da tásilderdi paıdalana otyryp jasyrý nemese bir taýarlarǵa basqalardyń túrin berý – quqyq buzýshylyqtyń tikeleı obektileri bolǵan taýarlar tárkilene otyryp nemese onsyz, sondaı-aq ákimshilik quqyq buzýshylyq jasaýdyń tikeleı nysanalary bolyp tabylatyn taýarlar men zattardy Eýrazııalyq ekonomıkalyq odaqtyń kedendik shekarasy arqyly jasyryp ótkizý úshin paıdalanylǵan arnaıy ázirlengen qupııa oryndary bar taýarlar men kólik quraldary tárkilene otyryp, jıyrma bes aılyq eseptik kórsetkish mólsherinde aıyppul salýǵa alyp keledi.
Materıaldar Jetisý oblysy Panfılov aýdandyq sotyna berildi. Sottyń 2023 jylǵy 28 tamyzdaǵy qaýlysymen ekonomıkalyq odaqtyń kedendik shekarasy arqyly jasyryn ótkizý úshin paıdalanylǵan Aýdı 100 markaly kólik quraly men taýardy tárkileı otyryp, 25 AEK (86250 teńge) mólsherinde ákimshilik aıyppul túrinde jaza taǵaıyndaldy.
Sot sheshimi kúshine engen joq.
Eýrazııalyq ekonomıkalyq komıssııanyń 2017 jylǵy 20 jeltoqsandaǵy № 107 «Jeke paıdalanýǵa arnalǵan taýarlarmen baılanysty jekelegen máseleler týraly» sheshimine sáıkes, bir jeke tulǵa úshin 200 dana nemese 1 blok temekini tasymaldaý normalary belgilengen.