Qorǵas arqyly taýar aınalymnyń kólemi 8 esege artady

ASTANA. QazAqparat - Infraqurylymdy jetildirý arqyly Qorǵas arqyly taýar aınalymnyń kólemin 8 ese arttyrýǵa múmkindik beredi. Bul týraly búgin Ortalyq kommýnıkatsııalar qyzmetinde «Nurly jol» baǵdarlamasyn iske asyrý máselesine arnalǵan brıfıngte QR Ulttyq ekonomıka mınıstriniń birinshi orynbasary Marat Qusaıynov málim etti.

«Indýstrııalyq ınfraqurylymdy damytý úshin 2015 jyly Ulttyq qordan 81 mlrd. teńge bólinedi, onyń ishinde «UIMT» AEA ınfraqurylymyn salý úshin - 68,5 mlrd. teńge, «Qorǵas-Shyǵys qaqpasy» AEA ınfraqurylymyn damytý úshin 12,5 mlrd. teńge qarastyryldy. «UIMT» AEA ınfraqurylymyn salýdy aıaqtaý shamamen 1,8 trıllıon teńge kóleminde ınvestıtsııalar tartýǵa jáne paıdalaný kezeńinde shamamen 1,5 myń turaqty jumys ornyn, sondaı-aq qurylys kezeńinde 5 myńnan astam jumys ornyn ashýǵa múmkindik beredi», - dedi ol.

M.Qusaıynovtyń sózine qaraǵanda, «Qorǵas-Shyǵys qaqpasy» AEA ınfraqurylymyn salýdy aıaqtaý Qorǵas arqyly taýar aınalymnyń kólemin 8 ese arttyrýǵa múmkindik beredi, bul óz kezeginde júk tasymaldaýdy jylyna 4 mln. tonnaǵa deıin ulǵaıtady. Nátıjesinde, 150 mlrd. teńge jeke ınvestıtsııalar tartylady jáne 20 myńǵa deıin jumys orny qurylatyn bolady.