Qorǵanys óndirisine jańa mehanızmder engiziletin bolady

ASTANA. QazAqparat - Ulttyq ǵarysh ortalyǵynda 2017 jyldyń qorytyndysy men «Tórtinshi ónerkásip jaǵdaıyndaǵy damýdyń jańa múmkindikteri» atty Elbasynyń halyqqa Joldaýy turǵysynan aǵymdaǵy jylǵy negizgi tapsyrmalar boıynsha QR Qorǵanys jáne aeroǵarysh ónerkásibi mınıstrliginiń (QR QAÓM) alqasy ótip jatyr.

Alqa jumysyna Elbasynyń kómekshisi - Qazaqstan Respýblıkasy Qaýipsizdik Keńesiniń Hatshysy Vladımır Jumaqanov, QR Parlamentiniń depýtattary, QR Qorǵanys jáne aeroǵarysh ónerkásibi mınıstrliginiń jáne basqa da memlekettik organ, baǵynysty uıymdar men kásiporyndar basshylyǵy qatysty, dep habarlaıdy Qorǵanys jáne aeroǵarysh ónerkásibi mınıstrliginiń baspasóz qyzmeti.

 Búgingi tańda mınıstrlik eldiń qorǵanysy men qaýipsizdigin tıimdi túrde iske asyrýǵa múmkindik beretin salanyń normatıvtik-quqyqtyq bazasyn qalyptastyrý jumystaryn júrgizip jatyr.

 Memlekettik qorǵanystyq tapsyrysty qalyptastyrýdyń jańa mehanızmderin retteıtin jáne otandyq qorǵanys-ónerkásip keshenin qoldaý sharalaryn qarastyratyn «Qorǵanys ónerkásibi jáne memlekettik qorǵanystyq tapsyrys» zańynyń jobasy QR Parlamentine qaraýǵa engizildi. 

2018 jyldan bastap Qorǵanys mınıstrliginiń qorǵanystyq tapsyrys bıýdjeti QR QAÓM ótedi. Bul  áleýetti organdardy ózine tán emes fýnktsııalardan bosatady jáne qorǵanys-ónerkásip kesheni kásipornynyń ilgerilemeli damýyn qamtamasyz etedi.

Qorǵanys pen qaýipsizdikti qamtamasyz etý úshin memlekettiń jańa tehnologııalyq múmkindikterin qurýǵa baǵyttalǵan salanyń tujyrymdamalyq negizderi júzege asyrylýda.

Mınıstrliktiń basty jumys baǵyttary qataryna QR qorǵanys pen ulttyq qaýipsizdik salasyndaǵy máselelerdi sheshý úshin qarý-jaraqtyń jańa jáne perspektıvti túrlerin, tehnıkany óndirýdiń jáne qyzmetterdi kórsetýdiń tolyq tsıklin basqarýy da jatady.