Qorǵanys mınıstrliginiń ústinen ushyrylǵan kvadrokopter qolǵa tústi

NUR-SULTAN.QazAqparat - 2 maýsym kúni kezekshi bólimshe sarbazdary QR Qorǵanys mınıstrligi ǵımaratynyń ústinen ruqsatsyz ushyp júrgen ushqyshsyz apparatty (kvadropopter) baıqap qalyp, ony qolǵa túsirdi, dep habarlaıdy QR Qorǵanys mınıstrliginiń baspasóz qyzmeti.

Kvadrokopter men onyń ruqsatsyz ushyrylýyna qatysty materıaldar istiń mán-jaıyn anyqtaý úshin Esil aýdanynyń polıtsııa basqarmasyna joldandy. Ushqyshsyz apparattyń ıesi anyqtaldy, qazirgi tańda onymen quqyq qorǵaý organdarynyń ókilderi tıisti jumystar júrgizýde.

Qorǵanys mınıstrligi azamattarǵa ushqyshsyz basqarylatyn apparattardyń áskerı nysandardyń ústinen ruqsatsyz ushyrylýyna tyıym salynǵandyǵyn jáne mundaı áreket QR «Qazaqstan Respýblıkasynyń áýe keńistigi men avıatsııa qyzmeti týraly» Zańynyń 31 jáne 33 baptaryn buzý bolyp tabylatyndyǵy týraly birneshe márte eskertý jasaǵan.

Zańnyń atalǵan normalary men QR Ákimshilik quqyq buzýshylyqtar týraly kodeksiniń 563 babyn «Qazaqstan Respýblıkasynyń áýe keńistigin paıdalaný tártibin buzý» buzǵany úshin jeke tulǵalarǵa 10 AEK kóleminde, al laýazym ıelerine 20 AEK kóleminde aıyppul salynady.

Al ushqyshsyz basqarylatyn apparattardy (kvadrokopter) eldi mekenderde paıdalaný erejesi QR Indýstrııa jáne ınfraqurylymdyq damý mınıstrliginiń saıtynda jarııalanǵan.