Qorǵanys mınıstrliginiń ortalyq ansambli Ankarada kontsert ótkizdi

ANKARA. QazAqparat - Qazaqstannyń Túrkııa astanasyndaǵy elshiliginde elimizdiń Konstıtýtsııasy kúnine arnalǵan saltanatty is-shara ótti, dep habarlaıdy QazAqparat.

Merekeniń sońynda ult-azattyq kúrestegi Uly Jeńistiń 100 jyldyǵyna arnalǵan festıvalge Ankaraǵa kelgen Qazaqstan Respýblıkasy Qorǵanys mınıstrligi ortalyq ansambliniń ujymy óner kórsetip, kópshilikti tánti etti.

Konstıtýtsııa kúnin merekeleýge Qazaqstan Respýblıkasynyń Túrkııadaǵy Elshisi Erkebulan Sápıev, Qorǵanys mınıstriniń orynbasary general-leıtenant Sultan Qamaletdınov, kórnekti túrik saıasatkerleri, ǵalymdar, kompanııa ókilderi qatysty.

General-leıtenant Sultan Qamaletdınov táýelsizdik jyldary elimizdiń Ata Zańy turaqtylyq pen órkendeýdiń kepiline aınalǵanyn atap ótti.

Konstıtýtsııanyń qaǵıdattaryna súıenetin, Qazaqstan búginde álemdik arenada bedeldi ári qurmetti memleketke aınalǵanyn alǵa tartty.

Mereke sońynda Qazaqstan Qarýly kúshteri ulttyq áskerı-patrıottyq ortalyǵy ortalyq ansambliniń «Sarbazdar» folklorlyq-etnografııalyq toby maıor Darhan Rahymǵalıevtiń jetekshiligimen qazaqtyń áıgili «Saryarqa», «Adaı», «Shalqyma», «Jekpe-jek» jáne basqa da shyǵarmalaryn oryndady.