Qorǵanys mınıstrligine qaýipti oq-dárini óz betimen joıý quzyreti berilýi múmkin
«Arys qalasyndaǵy jarylystan keıin Qorǵanys mınıstrligi zymyrandar men oq-dárilerdi saqtaý nysandarynda tótenshe jaǵdaılardyń aldyn alýǵa baǵyttalǵan sharalar qabyldaǵan bolatyn. Osy eki jyldyń ishinde normatıvtik quqyqtyq bazany jetildirildi. Byltyr mamyr aıynda «Qazaqstan Respýblıkasynyń keıbir zańnamalyq aktilerine Qarýly Kúshterdiń, basqa da áskerler men áskerı quralymdardyń arsenaldary, bazalary men qoımalary janyndaǵy tyıym salynǵan aımaqtar men tyıym salynǵan aýdandar máseleleri boıynsha ózgerister men tolyqtyrýlar engizý týraly» Zańǵa qol qoıyldy. Osy zańdy iske asyrý úshin Úkimet qaýlysymen tyıym salynǵan aımaqtar men aýdandardy belgileý erejesi qabyldandy. Budan basqa, oq-dárilerdi uıymdastyrýdy jáne saqtaý tártibin reglamentteıtin vedomstvolyq normatıvtik quqyqtyq aktiler qaıta qaraldy», - deıdi mınıstrdik orynbasary.
Onyń sózine qaraǵanda, qorǵanys zańnamasyna áli de ózgerister enýi múmkin. Sonyń biri qaýipti oq-dáriniń kózin joıý máselesimen baılanysty.
«Bizdiń bastamamyzben zańnamaǵa Qorǵanys mınıstrligine saqtaý obektilerine qaýip tóndiretin nemese qaýip tóndirýi yqtımal oq-dárilerdi óz betinshe joıý quzyretin beretin ózgerister men tolyqtyrýlar engizilýde. Qazirgi tártip boıynsha paıdalanylmaıtyn oq-dárilerdiń bári Indýstrııa jáne ınfraqurylymdyq damý mınıstrliginiń «Qaztehnologııa» AQ vedomstvolyq uıymyna beriledi. Sol uıym qoldanystan shyqqan oq-dárini ónerkásiptik tásilmen kádege jaratady», - deıdi Rýslan Shpekbaev.
Qorǵanys mınıstrligi Qarýly Kúshterde qarý-jaraq pen oq-dárilerdi saqtaý obektilerin jetildirý jónindegi 2019-2024 jyldarǵa arnalǵan keshendi jospar ázirlegen. Vedomstvo ókiliniń aıtýynsha, sol jospardaǵy is-sharalardyń áli 50%-y oryndalmaǵan.
«Búgingi kúni qaýipsizdik talaptaryn jáne olardyń eldi mekenderden qashyqtyǵyn eskere otyryp, oq-dárilerdi saqtaıtyn jańa bazalary men arsenaldaryn salý jónindegi máseleler kesheni sheshildi», - dedi Qorǵanys mınıstriniń orynbasary.
Foto: Azamat Hojın