Qorǵanys mınıstrliginde baspanamen qamtamasyz etý boıynsha qabyldaý ótti

NUR-SULTAN. QazAqparat - Nur-Sultan qalasynda qorǵanys vedomstvosy basshysynyń tapsyrmasy boıynsha Qazaqstan Respýblıkasy Qorǵanys mınıstriniń orynbasary general-leıtenant T. Muhtarov áskerı qyzmetten zapasqa bosatylǵan adamdarmen kezdesti, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Qabyldaý barysynda Qorǵanys mınıstriniń orynbasary eńbek ótili 10 jyldan asatyn, biraq 20 jyldan kem áskerı qyzmetten zapasqa bosatylǵan áskerı qyzmetshilerdi baspanamen qamtamasyz etý sheńberinde qoldanystaǵy turǵyn úı zańnamasynyń negizgi erejelerin túsindirdi.

Kezdesý qorytyndysy boıynsha Mınıstrdiń orynbasary zapasqa bosatylǵan adamdardyń usynystaryn tyńdap, olar turǵyn úı qarym-qatynasy máseleleri boıynsha Zań jobasyna ári qaraı engizile otyryp, vedomstvoaralyq komıssııanyń otyrysynda qaralatynyn atap ótti.

Ótken jyldan bastap baspanamen qamtamasyz etýdiń jańa modeli engizilgenin esterińizge sala keteıik. Onyń aıasynda 37 myńnan asa áskerı qyzmetshi jeke arnaıy shottar men depozıtter ashty, 2 myńnan asa otbasy elimizdiń túkpir-túkpirinde jekemenshik baspanaǵa ıe boldy. Qarýly Kúshterdiń turǵyn úı qorynda turatyn 30-dan asa zeınetker Nur-Sultan, Aqtaý, Aqtóbe, Aıagóz, Arys, Saryózek, Semeı, Taldyqorǵan, Óskemen, Shymkent qalalarynda jekeshelendirýge jatatyn baspanalaryn aýystyrdy.

Áskerı qyzmetshiler men áskerı zeınetkerlerdi baspanamen qamtamasyz etý tártibi týraly qosymsha qajetti aqparat Qorǵanys mınıstrliginiń www.mod.gov.kz resmı resýrsynyń «Áleýmettik qamtamasyz etý» bóliminde ornalastyrylǵan. Qorǵanys vedomstvosynyń saıtynda kórsetilgen «qaýyrt jeliniń» nómirlerine qońyraý shalyp, onlaın konsýltatsııa alýǵa bolady.