Qorǵanys mınıstrligi Sý-34 joıǵysh jáne Sý-39 shabýyldaýshy ushaqtaryn satyp almaq
«Egemen Qazaqstan» gazetine jarııalanǵan maqaladaǵy derekterge qaraǵanda, Memleket basshysy – Qarýly kúshterdiń Joǵarǵy Bas qolbasshysy Qasym-Jomart Toqaev 2022 jylǵy 19 qańtar kúngi Qorǵanys mınıstrliginde sóılegen sózinde geosaıası jaǵdaıdy jáne óńirlik deńgeıdegi qaýip-qaterlerdi eskere otyryp, Qarýly kúshterdiń jaýyngerlik qabiletin túbegeıli arttyrýdy talap etti.
Prezıdent, sondaı-aq áskerı-kóliktik avıatsııa parkin tolyqtyrý qajettigin de basa aıtty. 2022 jylǵa arnalǵan qarý-jaraq pen áskerı tehnıkany satyp alý josparyn qaıta qaraýdy tapsyrdy.
«Osy tapsyrmalardy oryndaý maqsatynda júk kóterimdiligi 40 tonnaǵa deıin jetetin A-400M aýyr áskerı-kóliktik ushaqtaryn satyp alý josparlanyp otyr»,-delingen saraptamalyq maqalada.
Sondaı-aq onda elimizdiń Áýe qorǵanys kúshteri qazirgi zamanǵy 4++ býyndaǵy Sý-30SM joıǵyshtarmen, óz tobynda úzdik sanalatyn S-295 áskerı-kóliktik ushaqtarymen, Zlin oqý-jattyǵý ushaqtarymen, ES-145, Mı-171Sh tikushaqtarymen, Mı-35M kóliktik-jaýyngerlik tikushaqtarymen tolyqtyrylǵany aıtylǵan.
Keleshekte Sý-34 joıǵysh-bombalaýshy, Sý-39 shabýyldaýshy ushaqtaryn satyp alý josparlanýda.
«Áýe shabýylyna qarsy qorǵanys tehnıkalary parki de jańartylýda. Búginde S-300PS, S-200, S-125 zenıttik-zymyran keshenderi, otandyq «Nur» radıolokatsııalyq stantsııalary jaýyngerlik kezekshilikti laıyqty atqaryp keledi. Áýe shabýylyna qarsy qorǵanys júıesiniń, onyń ishinde dáldigi joǵary qarýlardyń múmkindigin arttyrý úshin 2020 jyly Býk-M2E zenıttik-zymyran kesheniniń dıvızıony jaýyngerlik qyzmetke kiristi.
Barlaý, onyń ishinde radıolokatsııalyq barlaý mindetterin oryndaý, kedergiler keltirý jáne táýliktiń kez kelgen ýaqytynda jerústi nysanalaryna dál soqqy berý úshin «Wing Long-1» ekpindi-barlaý, «Orlan-10E» barlaý, «Skylark – 1Lex» taktıkalyq ushqyshsyz ushatyn apparattary satyp alyndy. Sondaı-aq, túriktiń «Anka» tektes drondaryn satyp alý máselesi de qarastyrylýda. Jalpy, áskerlerdi ushqyshsyz ushý apparattarymen jaraqtandyrý qajettilikke sáıkes josparly túrde júzege asyrylatyn bolady», - degen avtor maqalasynda.
Mınıstrdiń orynbasarynyń málimetinshe, Qazaqstannyń Qarýly kúshteri 30 jyl ishinde 4 myńnan astam zamanaýı qarý-jaraq pen áskerı tehnıka túrlerimen qamtamasyz etildi.