Qorǵanys mınıstrligi snarıadtar týraly jelide taraǵan vıdeoǵa túsinik berdi

NUR-SULTAN. QazAqparat - Qorǵanys mınıstrligi paıdalanýǵa jaramsyz oq-dárilerdi Indýstrııa jáne ınfraqurylymdyq damý mınıstrliginiń vedomstvolyq uıymy «Qaztehnologııa» aktsıonerlik qoǵamyna beredi, dep habarlaıdy QazAqparat.

Mınıstrliktiń habarlaýynsha, atalmysh «Qaztehnologııa» AQ uıymy olardyń quramyndaǵy jarylys qaýpi bar zattardy alyp, ony joıa otyryp, óndiriste kádege jaratý protsesin júrgizedi.

Oq-dárilerdiń synyqtary osyndaı úrdisten keıin ǵana gosreestr.kz elektrondyq saýda alańy arqyly satýǵa qoıylady.

Vıdeoda kórsetilgen snarıadtardyń syrty men oqsaýyty – bul oq-dárilerdi kádege jaratqannan keıin alynǵan jáne elektrondyq alańyndaǵy saýda arqyly jeke kásiporynǵa satylǵan metall synyqtary. Olar qorshaǵan ortaǵa eshqandaı qaýip tóndirmeıdi.

Óndiristik baza «Baqtııar-Group» JShS-ǵa tıesili ekeni tekserý barysynda anyqtaldy. Onyń aýmaǵynda qara metall synyqtary (kúıdirilgen metall, bolat jáne shoıyn metall) saqtalǵan.

Atalǵan metaldy «Baqtııar-Group» JShS 2021 jyly 30 naýryzda Túrkistan oblysy, Arys qalasynda «Qaztehnologııa» AQ-nyń metall synyqtary qoımasymen jasalǵan shart negizinde satyp alǵan.

«Baqtııar-Group» JShS habarlamaǵa sáıkes zańdy mekenjaıy: QR, Jambyl oblysy, Baızaq aýdany, Sarykemer aýylynda tirkelgen. Bul uıymnyń tústi jáne qara metall synyqtary men qaldyqtaryn jınaý (daıyndaý), saqtaý, óńdeý jáne ótkizý boıynsha qyzmetti júzege asyrýdy bastaǵany týraly lıtsenzııasy bar.

26 tamyzda órt shyqqan Jambyl oblysy Baızaq aýdanyndaǵy oq-dáriler qoımasynda mundaı oq-dáriler saqtalmaǵanyn aıta ketken jón.

Kópshilikke túsinikti bolý úshin aıta keteıik, jelide Baızaq aýdanynda jınalǵan snarıadtar týraly vıdeo taraǵan edi.