Qorǵanys mınıstrligi qazaqstandyq bitimgershilerge jasalatyn jeńildikter týraly aıtty
Onyń sózine qaraǵanda, bitimgershi sarbazdardyń quqyqtyq jáne áleýmettik qorǵalýy halyqaralyq, sondaı-aq Qazaqstan zańnamasymen laıyqty deńgeıde rettelip otyr.
«Áleýmettik qorǵalýy jaǵy bizde eskerilgen. Birinshiden, bizdiń jaýyngerler úsh ese joǵary kólemde eńbekaqy alady jáne bitimgerlik qyzmet kezeńinde tegin tamaqpen qamtamasyz etiledi. Sonymen qatar elge oralǵannan keıin, aqysyz negizde shıpajaıda emdeledi. Qyzmet ótkergen merzimindegi 1 aıy 1,5 aılyq merzim retinde esepteledi»,-dedi T. Muhtarov Májilistegi Úkimet saǵatynda.
Osy oraıda ol bitimgerlik «Qazbat» batalony 2000 jyly qurylǵanyn eske salyp ótti.
Qorǵanys mınıstrliginiń málimetinshe, «Qazbat» sapyna enýge nıettiler qatary qalyń kórinedi. Sondyqtan da irikteýdiń qatań tártibi bekitilgen. Osy oraıda densaýlyq jaǵdaıy, sporttyq daıarlyǵy, kásibı daǵdylary, tilderdi meńgerýi, psıhologııalyq turaqtylyǵy jáne basqa da jeke qasıetteri eskeriledi.
T. Muhtarovtyń aıtýynsha, qazirgi kezeńde bul bólimder tolyqtaı daıyndyqtan ótti. Olar qalalyq jáne aýyldy jerlerde jaýyngerlik is-qımyldardy júrgizýge, tutqyndardy bosatý áreketterine oqytylyp, daıyndaldy. Onyń ishinde barlaý sharalaryna, patrýldik operatsııalar jáne basqa mańyzdy is-qımyldardy ıgerip shyqqan kórinedi.
Budan buryn habarlanǵandaı, QR Syrtqy ister mınıstri Qaırat Ábdirahmanov Qazaqstan jaýyngerleri BUU-nyń eń qaýipsiz mıssııalaryna jiberiletinin aıtqan bolatyn.