Qorǵanys mınıstrligi bedeldi robototehnıka chempıonatynyń jeńimpazdaryn marapattady

ASTANA. QazAqparat - Jenevada 167 eldiń oqýshylary qatysqan First global Challenge jas robototehnıkterdiń halyqaralyq jarysy ótti, dep habarlaıdy QazAqparat QR Qorǵanys mınıstrliginiń baspasóz qyzmetine silteme jasap.

Bul saıysta qazaqstandyq oqýshylar 16 oıyn matchyn ótkizip, sonyń bárinde jeńimpaz atanyp, upaı sany boıynsha rekord ornatty.

Respýblıka kúninde Qorǵanys mınıstriniń orynbasary general-leıtenant Sultan Qamaletdınov Almaty qalasyndaǵy Oqýshylar saraıynda boldy. Bul mekemede Alatau Creative Hub kovorkıng-ortalyǵynyń bazasynda Smart-sarbaz respýblıkalyq áskerı-patrıottyq ortalyǵynyń úıirmesi jumys isteıdi. Áskerı vedomstvo atynan ol talantty robototehnıkterdi jeńisimen quttyqtap, olarǵa gramotalar men estelik syılyqtar tabys etti.

«El basshylyǵy jastardy qoldaý boıynsha úlken jumys júrgizýde. Memleket basshysy Qasym-Jomart Toqaev óz sózinde mundaı jeńisterdiń mańyzdylyǵyn árdaıym atap kórsetedi. Olar ulttyń rýhyn kóteredi. Senderdiń jeńisteriń buǵan aıqyn dálel», - dedi mınıstrdiń orynbasary mektep oqýshylary aldynda sóılegen sózinde.

Kezdesý barysynda Ustem Robotics robototehnıkany damytý qorynyń basshysy Asylbek Myrzahmetov Jas sarbaz qozǵalysynyń tárbıelenýshilerine arnalǵan Smart Sarbaz robototehnıkany damytý baǵdarlamasyn tanystyrdy. Sonyń arqasynda olar áskerı ınjenerııa, robototehnıka negizderin bilip, jasandy ıntellekt qurýda óz kúshterin synap kóre alady.

Foto : gov.kz