Qorǵanys mınıstrligi áskerılerdiń daýly vıdeosyna qatysty túsinikteme berdi

ASTANA. QazAqparat - QR Qorǵanys mınıstrligi áskerı shenderin ishimdikpen atap ótken áıelderge qatysty vıdeoǵa túsinikteme berdi, dep habarlaıdy QazAqparat tilshisi.

«Kináliler qatań jazasyn aldy. Aıta keteıik, mundaı jaǵdaılar ilýde bireý ǵana. QR Qarýly Kúshterinde memlekettik qyzmettegi joǵary mádenıettilikti qalyptastyrýǵa jáne áskerı qyzmetshilerdiń ádepke jat qylyqtarynyń aldyn alýǵa qatysty keshendi sharalar turaqty túrde ótkizilip turady», - delingen resmı túsiniktemede.

Buǵan deıin QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń ókilderi áleýmettik jelide jarııalanǵan vıdeony taldaý barysynda, qyzmettik shenin ishimdikpen atap ótip otyrǵan áıelder Qorǵanys mınıstrliginiń qyzmetkerleri ekendigin anyqtaǵan bolatyn.

Agenttik qyzmetkerleri áskerı qyzmetshilerdiń tártipti saqtaý jaýapkershiligi Qazaqstan Respýblıkasynyń «Áskerı qyzmet jáne áskerı qyzmetshilerdiń mártebesi týraly» Zańyna sáıkes retteletinin aıtyp, zańnyń oryndalýyn qadaǵalaý Agenttik quzyretine kirmeıtinin, sondyqtan Qorǵanys mınıstrligine tıisti shara qoldaný týraly hat jiberilgenin málimdedi.