Qorǵanys mınıstrligi áskerı oqý oryndaryna qujat qabyldap jatyr
Qazaqstanda úsh áskerı joǵary oqý orny men eki kolledj jumys isteıdi. Joǵary bilikti áskerı kadrlardy daıyndaıtyn bilim ordalary – Radıoelektronıka jáne baılanys áskerı-ınjenerlik ınstıtýty, Almaty qalasyndaǵy Keńes Odaǵynyń Batyry Saǵadat Nurmaǵambetov atyndaǵy Qurlyq áskerleriniń áskerı ınstıtýty jáne Aqtóbe qalasyndaǵy eki márte Keńes Odaǵynyń Batyry Talǵat Bıgeldınov atyndaǵy Áýe qorǵanysy kúshteriniń áskerı ınstıtýty bolyp tabylady. Joǵary oqý oryndaryn bitirgender «leıtenant» áskerı ataǵyn alyp, taktıkalyq býyn komandıri bolyp shyǵady.
Qurlyq áskerleriniń áskerı ınstıtýtynda áskerı istegi menedjment baǵyty boıynsha motoatqyshtar, tank, desanttyq-shabýyldaý, barlaý, zymyran áskerleri men artıllerııa komandırleri daıyndalady. Logıstıka baǵytynda kýrsanttar materıaldyq-tehnıkalyq, tyldyq, azyq-túlik, zattaı qamtamasyz etý jáne zymyran-artıllerııalyq qarý-jaraq mamandyqtaryn meńgeredi. Sondaı-aq, «áskerı isti ınjenerlik qamtamasyz etý», «áskerı istegi RHB-qorǵaý», «áskerı ujymdaǵy áleýmettik jáne ıdeologııalyq jumys» baǵyttary boıynsha da bilim alady.
Radıoelektronıka jáne baılanys áskerı-ınjenerlik ınstıtýty radıonavıgatsııa, radıotehnıka jáne ınjınırıng, avtomattandyrý jáne ınfokommýnıkatsııalyq tehnologııalar, aqparattyq qaýipsizdik jáne kıberqaýipsizdik júıeleri boıynsha mamandar oqytady.
Keńes Odaǵynyń eki márte batyry Talǵat Bıgeldınov atyndaǵy Aqtóbe Áýe qorǵanysy kúshteriniń áskerı ınstıtýty «áýe kemelerin ushýǵa paıdalaný», «avıatsııalyq tehnıka jáne tehnologııalar» baǵyttarynda mamandar daıarlaıdy. Sondaı-aq, Marat Ospanov atyndaǵy Batys Qazaqstan Memlekettik medıtsına ýnıversıtetinde áskerı dárigerler daıyndaýdy júzege asyrady.
Kásiptik-tehnıkalyq bilim ordasy – Keńes Odaǵynyń batyry, Halyq Qaharmany, armııa generaly Saǵadat Nurmaǵambetov atyndaǵy Qorǵanys mınıstrliginiń elordalyq áskerı kolledji. Onda áskerı istegi avtomattandyrý jáne ınfokommýnıkatsııalyq tehnologııalar, qarý-jaraq pen áskerı tehnıkaǵa qyzmet kórsetý, áskerı istegi kishi býyn menedjmenti sııaqty mamandyqtarǵa serjanttar daıarlaıdy. Munda oqý merzimi eki jyl on aı.
Aqmola oblysy Şýchınsk qalasyndaǵy Shoqan Ýálıhanov atyndaǵy Qorǵanys mınıstrliginiń áskerı kolledjinde motoatqyshtar, tank jáne artıllerııa bólimshelerin basqarý mamandyqtary boıynsha serjanttardy daıarlaıdy. Kolledjde oqý merzimi bir jyl on aıdy quraıdy.
Memlekettik úlgidegi dıplom alyp, «kishi serjant» áskerı ataǵy berilgennen keıin túlekter serjanttar quramynyń ártúrli laýazymdarynda ári qaraı áskerı qyzmet ótkerý úshin Qarýly kúshterdiń áskerı bólimderine jiberiledi. Keleshekte olardyń mansaptyq ósýine, sondaı-aq kóp deńgeıli bilim berý júıesi sheńberinde, onyń ishinde shetelde odan ári oqýǵa múmkindikter ashylady.
Bul rette áskerı oqý oryndaryna túsý úshin jergilikti áskerı basqarý organyna ótinish berý qajet. Oqý barysynda áskerı joǵary bilim berý mekemeleriniń kýrsanttary men kolledj kadetteri tamaqpen, zattaı múlikpen, turǵyn jaımen jáne aqshalaı úlespen qamtamasyz etiletinin atap ótken jón.