Qorǵanys mınıstrligi áskerge shaqyrý úshin 33 myń bozbalaǵa izdeý jarııalaǵan

ASTANA. QazAqparat – Byltyr kúzgi áskerge shaqyrý kezeńinde 33 myń azamat izdeýde boldy. Bul týraly Qorǵanys mınıstrligi bas shtabynyń uıymdastyrý-jumyldyrý jumystary departamentiniń aǵa ofıtseri Rýslan Tapashev aıtty, dep habarlaıdy QazAqparat tilshisi.

«Azamattar túrli sebepter boıynsha, ásirese jumys babymen ózderiniń turǵylyqty jeri boıynsha áskerı esepten shyqpaı ketip jatady. Osyǵan baılanysty byltyrǵy kúzgi áskerge shaqyrý kezinde shamamen 33 myń azamat izdeýde boldy. Bulardyń kóbi - osyndaı sebeppen mekenjaıyn aýystyryp otyrǵan azamattar», - dedi ol.

Sonymen qatar, Rýslan Tapashev qazir áskerge shaqyrylatyn azamattar arasynda nevrologııalyq, ishki aǵza men kóz aýrýlary jıi kezdesetinin atap ótti.

Eske salaıyq, ótken jyly 35 myńǵa jýyq bozbala ásker qataryna alyndy.

Qosa keteıik, bıyl áskerı qyzmetke jaramdy, biraq ony ótkermegen zapastaǵy 345 ofıtser 4 aıǵa áskerı qyzmetke shaqyrylady.