Qorǵanys mınıstrligi áskerdegi sýıtsıd problemasyna qatysty túsinik berdi

ASTANA. QazAqparat – Qorǵanys mınıstrligi árbir áskerı qyzmetshiniń ólimine jaýapty. Bul týraly mınıstrliktiń tárbıe jáne ıdeologııalyq jumys departamentiniń bastyǵy Serik Borambaev aıtty, dep habarlaıdy QazAqparat tilshisi.

«Jyl basynan beri Qarýly Kúshterde áskerılerdiń ólimine baılanysty birneshe oqıǵa tirkeldi, onyń ishinde 4 sýıtsıd bar. Kópshiligi muny áskerdegi «dedovşınamen» baılanystyrady. Qorǵanys mınıstrligi beıbit zamandaǵy áskerı qyzmetshilerdiń ólimi úshin jaýapkershilikti óz moınyna ala ma?», - dep surady jýrnalıst Ortalyq kommýnıkatsııalar qyzmetindegi baspasóz máslıhatynda.

«Ókinishke oraı, Qarýly Kúshterde mundaı faktiler boldy. Biraq Qarýly Kúshterdiń de qoǵamnyń bir bóligi ekenin atap ótken jón. Qoǵamda bolyp jatqan barlyq protsester Qarýly kúshterde de júredi. Siz qazir aıtqan másele de bar. Biraq biz naqty anyqtaýymyz kerek: biz Qarýly Kúshter qurylymy bolyp sanalamyz, tek Qorǵanys mınıstrligine baǵynatyn áskerı bólimderge jaýap bere alamyz. Bizden bólek, Іshki ister mınıstrligine, Ulttyq qaýipsizdik komıtetine, Tótenshe jaǵdaılar mınıstrligine jáne Memlekettik kúzet qyzmetine baǵynatyn áskerı bólimder de bar», - dep túsindirdi Qorǵanys mınıstriniń orynbasary Sultan Qamaletdınov.

Mınıstrliktiń tárbıe jáne ıdeologııalyq jumys departamenti bastyǵynyń mindetin atqarýshy Serik Borambaev vedomstvo áskerı qyzmetshilerdiń qaza bolýyna jaýapty ekenin aıtty.

«Iá, biz jaýaptymyz. Árbir jaǵdaı marqumnyń týystary men jaqyndary úshin ǵana emes, barlyq Qarýly Kúshter úshin de orny tolmaıtyn qaıǵy. Bul rette jaýapkershilik tómengi deńgeıden Qorǵanys mınıstrliginiń basshylyǵyna deıin bárine artylady. Sondyqtan ár jaǵdaı jeke jáne erekshe tártipte qarastyrylatynyn túsiný kerek. Qarýly Kúshter men basqa áskerler men qurylymdar bar. Merzimdi qyzmet sarbazdary, kelisimshart boıynsha áskerı qyzmetshiler, ofıtserler bar. Ofıtserlermen jáne kelisimshart boıynsha áskerı qyzmetshilermen baılanysty ólim de ártúrli: aýyryp qaıtys bolǵandar, dol-kólik apatyna ushyraǵandar bar, óıtkeni olar qoǵamnyń barlyq azamattary sııaqty qyzmetke kelip, keshke úıine ketedi. Sodan keıin olar qarapaıym azamattar sııaqty kúndelikti máselelermen aınalysady», - dedi Serik Býrambaev.

Sonymen birge spıker Qorǵanys mınıstrliginiń áskerdegi sýıtsıd jaǵdaılaryn azaıtý úshin qabyldaǵan sharalaryn aıtty.

«Prezıdenttiń tapsyrmasymen birqatar sharalar qabyldandy, barlyq Qarýly Kúshter men quralymdarmen birge «Ómirdi saqta» baǵdarlamasy ázirlendi. Qarýly Kúshter «halyq únine qulaq asatyn memleket» sheńberinde Prezıdent – Joǵarǵy Bas Qolbasshy qoıǵan ashyq jumysty júrgizip jatyr. Munda ata-analar nemese Sarbazdar analary komıtetiniń ókilderi onlaın-oflaın formatta áskerı bólimniń ómirimen tanysa alady. Jaýapkershilik birinshi kezekte bizge júkteledi», - dedi S. Býrambaev.