Qorǵanys mınıstrligi 82 mlrd teńgege brondalǵan tehnıka satyp alady

NUR-SULTAN. QazAqparat – Qorǵanys mınıstrligi bıyl «Arlan» brondalǵan dóńgelekti tehnıkanyń 10 danasyn satyp alady. Bul jaıynda Májilis depýtattarynyń saýalyna QR Qorǵanys mınıstri Rýslan Jaqsylyqovtyń jaýabynda aıtylǵan, dep habarlaıdy QazAqparat tilshisi.

Mınıstrdiń aıtýynsha, 2016 jyldan bastap bólimshelerdi jasaqtaý úshin «Qazaqstan Paramaýnt ınjınırıng» JShS-dan 138 birlik 6h6 «Arlan» brondalǵan dóńgelekti tehnıka satyp alyndy. 2022 jyly osyndaı tehnıkanyń 10 birligi jetkiziledi.

«Al 2023 jyly jaýyngerlik modýlderi bar «Arlan» brondalǵan dóńgelekti tehnıkanyń taǵy 20 birligin jetkizý josparlanýda. ıAǵnı, Qarýly kúshter múddesinde satyp alynǵan 6h6 «Arlan» brondalǵan dóńgelekti tehnıkanyń jalpy sany 168 birlikke jetedi. Bul aqshalaı mánde 82 mlrd teńgeden astamdy quraıdy», - dep atap ótedi mınıstr.

Onyń atap ótýinshe, Qorǵanys mınıstrligi qazirgi ýaqytta Qazaqstan Paramaýnt ınjınırıngpen birlesip, 4h4 BDM bazasyndaǵy perspektıvaly arnaıy mashınalar shyǵarý máselesin pysyqtap jatyr.

«Sonymen, artıllerııanyń oq atýyn basqarý mashınasyn shyǵarýǵa arnalǵan tehnıkalyq tapsyrma daıyndaldy jáne ony vedomstvoishilik keńesshi organnyń otyrysynda qaraý josparlanýda. «QPI» JShS shyǵarǵan 4h4 BDM bazalyq mashına retinde aıqyndalǵan jaǵdaıda, osyndaı 18 birlik jaýyngerlik tehnıkany satyp alý máselesi qaralatyn bolady», - dedi Rýslan Jaqsylyqov.