Qorǵanys mınıstriniń orynbasary: Arystaǵy jarylysty egjeı-tegjeıli tekseremiz

NUR-SULTAN. QazAqparat - QR Qorǵanys mınıstriniń orynbasary Tımýr Dándibaev Arys qalasyndaǵy áskerı bólim aýmaǵyndaǵy jarylysqa baılanysty túsinik berdi, dep habarlaıdy QazAqparat tilshisi.

Qorǵanys mınıstrliginiń ókili osyndaı jaǵdaıda birqatar qajetti sharalar iske asyrylatynyn, onyń ishinde evakýatsııalaý jumystary atqarylatynyn atap ótti.

«Oryn alǵan jarylystyń aýqymy men naqty sebebi ázirge belsiz. Qazirgi kezde jarylystyń zardaptaryn joıý sharalary júrgizilýde. Sondyqtan tekserý jumystary úshin tıisti ýaqyt qajet», - dedi ol Senatta tilshiler saýalyna jaýap bere otyryp.

Budan bólek T. Dándibaev búgin oryn alǵan jarylysty 2009 jylǵy oqıǵamen salystyrýǵa bolmaıtynyn aıtty.

«Qarý-jaraqpen, áskerı tehnıkamen baılanysty sharalar únemi belgili bir táýekeldi týyndatady. Árıne, bul oqıǵanyń sebepterin egjeı-tegjeıli tekseremiz», - dedi mınıstrdiń orynbasary.

Sonymen qatar tilshiler T. Dándibaevtan eskirgen qarý-jaraqtyń jaǵdaıy týraly surady.

«Bizde keńestik kezeńnen qalǵan qarý-jaraq bar. Osy oraıda saqtaý merziminen asqan qarý-jaraq pen oq-dárini ýtılızatsııalaý boıynsha sharalardy iske asyrýdamyz», - dedi ol.

Budan buryn habarlanǵandaı, Arys áskerı bólimniń qoımasynda qýatty jarylys boldy.

Osy oraıda Shymkent qalasynyń TJD turǵyndar úshin qaýyrt jeli ashylǵanyn habarlady.