Qorǵanys mınıstri Otardaǵy oq-dárilerdiń saqtalý jaǵdaıyn tekserdi
08:40, 12 Shilde 2019
OTAR. QazAqparat - QR Qorǵanys mınıstri general-maıor Nurlan Ermekbaev Gvardııa garnızonyna barǵan jumys saparynda oq-dári qoımalaryn tekserdi, dep habarlaıdy QazAqparat mınıstrliktiń baspasóz qyzmetine silteme jasap.
Tekseris kezinde Nurlan Ermekbaev órt qaýipsizdigi talaptarynyń saqtalýyna jiti mán berdi.
Laýazymdy tulǵalar qorǵanys mınıstrine zymyrandar men oq-dárilerdi saqtaý tártibi, qarý-jaraqtyń, áskerı jáne arnaýly tehnıkalardyń jaı-kúıi, sondaı-aq materıaldyq-tehnıkalyq quraldar týraly baıandady.
Vedomstvo basshysy qoımany tekserý barysynda oq-dáriler men áskerı tehnıkalardy saqtaý qaýipsizdigin arttyrý boıynsha naqty tapsyrmalar berdi ári áskerı qyzmetshilerdiń órt qaýipsizdigi erejelerin buljytpaı oryndaýdyń mindetti ekenin eskertti.