Qorǵanys mınıstri Qarýly Kúshterdiń áskerı qyzmetshilerin merekemen quttyqtady
«Qarýly Kúshterdiń áskerı qyzmetshileri men azamattyq personaly udaıy jaýyngerlik ázirliktiń joǵary deńgeıinde bolyp, kásibılikterin arttyra otyryp, Otan aldyndaǵy Konstıtýtsııalyq boryshtaryn laıyqty túrde atqarýda. Jaýyngerlik daıarlyqtyń kóptegen iri aýqymdy sharalary, el basshylyǵy men bedeldi halyqaralyq sarapshylardyń joǵary baǵasy osynyń aıqyn dáleli. Birneshe kún buryn biz «Aıbalta» strategııalyq komandalyq-shtabtyq oqý-jattyǵýyn aıaqtadyq. Oǵan 8 myńnan asa áskerı qyzmetshi, 2 myńnan asa birlik qarý-jaraq pen áskerı tehnıka tartyldy. Qazaqstan Prezıdenti - Qarýly Kúshterdiń Joǵarǵy Bas Qolbasshysy oqý-jattyǵýdyń belsendi fazasyna qatysyp, jaýyngerlerimizdiń sheberligine joǵary baǵa berdi. Negizgi júkteme men jaýapkershilik alańda táýlik boıy bolyp, jattyǵý ótkizgen, tehnıkany tizgindep, jaýyngerlik oq-dárilermen nysana boıynsha atý jattyǵýlaryn ótkizgen komandırler men serjanttardyń, sarbazdardyń moınyna artyldy», - dedi general-maıor N. Ermekbaev Qorǵanys mınıstrliginde ótken saltanatty shara barysynda.
Vedomstvo basshysy anaǵurlym erekshe kózge túsken áskerı qyzmetshilerge medaldar men gramotalar tabystady. Birqatar áskerı qyzmetshilerge Qorǵanys mınıstriniń buıryǵymen kezekti áskerı ataqtar tapsyryldy. Olardyń jekelegeni merziminen buryn berilip otyr.