Qorǵanys mınıstri áskerı bilimdi jetildirý jóninde keńes ótkizdi (FOTO)
Keńes barysynda oqý jyly qorytyndylanyp qana qoımaı, jańa oqý jylynyń baǵyttary anyqtaldy, sondaı-aq mınıstr áskerı bilim reformalarynyń negizgi erejelerine jeke toqtalyp ótti.
«Áskerı bilim - jalpy bilim retinde - tutas el úshin, onyń qarýly kúshteri men áskerı qyzmetshileri úshin jańa básekelestik alańy. Búginde ol tek bilikti qyzmet úshin ǵana emes, berik bolyp kúsheıý úshin qajet. Jyldamdyq pen qarqyndylyq - bul HHІ ǵasyrdaǵy zııatkerlik revolıýtsııasynyń ereksheligi», - dedi QR Qorǵanys mınıstri Imanǵalı Tasmaǵambetov.
«Bilim berý týraly» QR Zańynyń áskerı bilim erekshelikterine qatysty bólimine aıtarlyqtaı ózgerister engizildi. 2016 oqý jylynda joǵary áskerı oqý oryndary áskerı bilimniń erekshelikterin eskere otyryp kredıttik tehnologııa boıynsha oqytý júıesine ótedi. Osynyń arqasynda akademııalyq utqyrlyq máselesi sheshilip, kýrsanttar Nazarbaev ýnıversıteti, QBTÝ, Ál-Farabı atyndaǵy QazUÝ jáne basqa da jetekshi azamattyq joǵary oqý oryndarynyń arnaıy pánderin (kıber keńistikpen baılanysty tehnıkalyq jáne basqa) zerdeleıdi. Sondaı-aq oqý jylynyń basynan bastap bilimdi baǵalaý baldyq kórsetkish júıesi boıynsha júrgiziledi, bul sybaılas jemqorlyqtyń oryn alýyn azaıtyp, bilim alatyndardyń óz jetistikterine sáıkes jeke kórsetkishin qurýyna múmkindik beredi.
Budan ózge, áskerı mamandyqtardy toptastyrý qaraldy - jańasha toptastyrýda áskerı mamandyqtar aýqymy keńeıdi. Bul áskerı qyzmetshilerge zapasqa shyqqanda azamattyq ortada óziniń kásibı erekshelikterin qoldanatyn oryndar tabýyna yqpal etedi. Sonymen qatar toptastyrý barysynda kıberqaýipsizdik aýqymynda qazirgi kezde talap etiletin mamandyqtar qaraldy.
Bıylǵy jyly 10 áskerı kafedra ashylady. Áskerı kafedralar jelisiniń artýy qajetti jumyldyrý resýrstar sanyn qalyptastyrýǵa jáne áskerı-patrıottyq tárbıege jastardy keńinen tartýǵa múmkindik beredi.
Aqtóbede ashylǵan áskerı-medıtsınalyq fakýltet is júzinde qoldaný satysyna jaqyn ekenin aıta ketken jón.
«Aldaǵy jyldary áskerı oqý oryndarynyń túlekteri úlken qaqtyǵystardy sheshýge qabiletti jáne qoıylǵan mindetterdi oryndaýǵa daıyndyǵyn kórsete otyryp, bólimshelerdi basqaratyn bolady. Bitirýshiler jaýyngerlik is-qımyldy júrgizýde tosyn ádisterdi qoldana alýy, kıberqaýipke nátıjeli túrde qarsy tura bilýi tıis. Bitimgershilik qyzmet áskerı is-qımyldyń bir túri bolyp qalyptasyp keledi. Sondyqtan bolashaq áskerı qyzmetshilerge turaqtylyq pen qaýipsizdikti qamtamasyz etý operatsııalaryn júrgizý jáne gýmanıtarlyq kómek kórsetý boıynsha bilim berý qajet», - dep atap ótti qorǵanys vedomstvosynyń basshysy.
Atalǵan keńeste T. Bıgeldınov atyndaǵy «Jas Ulan» respýblıkalyq mektebiniń bastyǵy polkovnık Atyǵaı Balǵabekov, QR QM Kadet korpýsynyń bastyǵy polkovnık Talǵat Baýdınov, Qurlyq áskerleri áskerı ınstıtýtynyń bastyǵy general-maıor Vasılıı Rysbaev sóz sóıledi.