Qorǵanys mınıstri áskerı barlaýshylardy quttyqtady

ASTANA. QazAqparat – Áskerı barlaý kúni merekesine oraı, Qarýly kúshterdiń Ulttyq áskerı-patrıottyq ortalyǵynda saltanatty jıyn ótti. Bul týraly QazAqparat Qorǵanys mınıstrliginiń baspasóz qyzmetine silteme jasap habarlaıdy.

Qorǵanys mınıstri, general-polkovnık Rýslan Jaqsylyqov áskerı barlaý organdarynyń áskerı qyzmetshileri men ardagerlerin quttyqtap, memlekettiń ulttyq qaýipsizdik júıesiniń jalpy qurylymynda áskerı barlaýdyń mańyzdy rólin atap ótti.

«Qazirgi áskerı barlaý kásibı áskerı qyzmetshilerden quralǵan, joǵary tehnologııalyq qarý-jaraqpen jáne áskerı tehnıkamen jabdyqtalǵan bólimder men bólimshilerden turady. Áskerı barlaýshylar kóbine Qarýly kúshterdiń basqa túrleri men bólimsheleriniń múmkindikterinen tys tapsyrmalardy oryndaıdy. Bul qyzmet olardan kásibı mashyqty, utqyrlyqty, biliktilikti, ózara kómek kórsetýdi, jaýyngerlik daıarlyqty jáne kez kelgen ýaqytta táýekelge bel býýǵa jáne janqııarlyqqa daıyn bolýdy talap etedi», - dedi mınıstr.

Qazaqstan áskerı barlaý organdarynyń 30 jyldyǵyn merekeleý aıasynda kópshilikke beımálim, dese de Qarýly kúshter men elimiz úshin qyzmeti asa mańyzdy áskerı qyzmetshiler marapattaldy. Qazaq áskerindegi barlaý qurylymdarynyń qalyptasýy men damýynyń negizin qalaǵan ardager barlaýshylar da nazardan tys qalmady.

Saltanatty shara dástúrge saı Ulttyq áskerı patrıottyq ortalyǵyndaǵy shyǵarmashylyq ujymnyń barlaý bólimsheleriniń jaýyngerlerine arnaıy daıyndaǵan kontsertimen aıaqtaldy.

Buǵan deıin habarlanǵanyndaı, búgin Qazaqstanda Syrtqy barlaý qyzmeti kúni.